台語華語辭典
台灣記憶
[轉去本站首頁]    [轉去台灣俗語鹹酸甜]

家己無看著耳仔。

    國小ê 課程按呢排,拜六第一節課單週是週會,雙週是班會,自從每兩禮拜就有一擺週休二工以後,週會kap 班會著輪流來,頂禮拜又閣輪著開班會,學生囡仔有夠歡喜,因為真久m̄-bat 閣hō͘ in 大聲議論,尤其若講別人ê m̄ 著,攏kài 大聲kài 有趣味。
    主席報告:
    各位小朋友!真歡喜徛tiàm 遮做主持,希望逐家tàu 相仝,hō͘ 班會開khah 輕鬆,有話做恁講,tio̍h-ài 先giâ手 --ō͘!
    幹部報告:
    班長:chit 禮拜ê 表現真好,校長有kā 咱o-ló,感謝!
    風紀股長:放學路隊ài 排卡好勢咧,早自修mài 講話,拜託逐家。
    衛生股長:掃地著卡緊淡薄,chiah-bē 掃bē 了 。
    ……
    閣來生活檢討,beh 發表--ê 請giâ 手!
    小博士:阿明足愛講話,攏m̄ 讀冊,希望伊改過。
    古錐--ê:金火--è 攏愛kâng giú 頭毛,人上chheh ,請老師處罰。
    Làu-chàng --ê:有ê 小朋友無名牌,hō͘ 糾察員記去,『要改過。』
    叔卿:Làu-chàng-ê 家己穿衫無整齊,閣愛講別人。
    哈!哈!哈!家己m̄ 好愛講別人!哈!哈!哈!…
    Mài 講話!Chit-mái beh 請老師指導講話,逐家恬恬聽。
    各位小朋友!今仔日班會真鬧熱,開了真成功,這就是民主時代,開會公開,有話逐家討論,好--ê繼續做,若歹--ê tio̍h-ài改。老師問恁一句話:啥物人有看著家己ê 耳仔?
    無法度啦!Kan-nā 有khòaiⁿ 別人ê--niâ!
    「正爿一葉,倒爿一葉,家己sian 看都看bē 著!」
    耳仔!耳仔!
    著!恁著是「家己無看著耳仔」啦!Tú-chiah 聽恁生活檢討,攏leh 講別人,無一個leh 檢討家己,按呢「有嘴講別人,無嘴講家己」m̄ 著,咱應該先檢討家己,chit 兩禮拜以來,有啥物欠點,有啥物著改進,檢討家己m̄-chiah 會進步,像恁按呢kan-nā 講啥人m̄ 好,啥人m̄ 著,bē 輸家己真乖真認真咧,這就是「家己無看著耳仔」,kan-nā 看著別人ê--niâ,希望以後改進。
轉去