台語華語辭典
台灣記憶
[轉去本站首頁]    [轉去台灣俗語鹹酸甜]

寧可信其有,m̄-thang 信其無。

    暗時看TV,看胡瓜 、高怡平 主持ê 「非常男女」節目,男女相親合意beh 過tiāⁿ ,講著合八字,實在hō͘ 人感覺人ê 迷信哪會chiah-ni̍h 不可思議,sian 想都hō͘ 你想bē 到ê 愚痴。
    婚姻ê 代誌,著兩人意愛,兩家序大人看會chiūⁿ 目 上要緊,當然門風相對,學問相當,嘛是促成美滿婚姻ê 要點,算命、合八字,he 是古早人對命運認識無夠,kó-put-jī-chiong 「寧可信其有,m̄-thang 信其無」ê 無奈,chit-mái 是啥物時代?火箭飛chiūⁿ 天,太空梭 會當se̍h 地球,太空、地球來來去去。就是探討人類ê 科學、心理學,嘛進步kah 講khit 來hō͘ 人會接受會了解ê 水準,因何心理學ê 分析人m̄ 聽,偏偏beh 聽hit-lō 相命嘴,星相家ê 胡lùi-lùi?
    人ê 落塗時 敢有影hiah 呢重要?仝年仝月仝日仝時生ê 人,何止你、我、伊,敢正實有影遮ê 人命運攏一致?無可能,人ê 命運好歹有牽礙--ê,m̄ 是kan-nā tī 八字而已,遺傳ê 因素,後天ê 教育,攏是影響一個人ê 前途。既然恁查某囝都合意,恁兩老--ê 嘛看了歡喜,哪著閣相信八字有合無合,有夠三八,有夠八卦。
    既然無相信八字影響命運,阿姆--à!O͘-ba-sáng!請問你哪著閣去chhōe 相命仙--ê 問疑問--neh?
    問一個放心--niâ!「寧可信其有,m̄-thang 信其無」,你敢m̄-bat 聽人講過?
    抑若kā 恁否認講m̄ 好,你beh 按怎?
    人in 少年--ê 若好就無問題,照少年人ê 決定就好勢啦!
    實在有夠矛盾,其實是失去信心,台灣人欠缺主宰,就是因為按呢ê 迷信,講伊迷信伊閣m̄ 信,講伊m̄ 信又閣beh 問,講是beh 問一個心安--niā-niā,欺騙自己,欺騙家己,bē 凍怪相命仙,bē 凍怪落塗時,應該著怪家己三八無藥醫,圓纏 閣欠主意。莫怪hō͘ 人kōaⁿ leh se̍h ,beh 也m̄ ,攏是家己kô-kô 纏。
    Chit 款心理,kap 咱台灣國人ê 圓纏仝一樣,hông thóng. 阮無愛,統一別人無才調,喝台灣獨立講bē 使?中華民國在台灣,這是啥物名?圓纏ê 話阮無愛聽,既然李總統倡 聲咱是新台灣(人),敢免看板另外換一個名,進入聯合國,全世界ê 人m̄-chiah 知影你是siáng 。到時in 中國仔若閣講咱是in ê 省份,抑是用hit-lō 飛彈kā 咱háⁿ ,咱著免閣「寧可信其有,m̄-thang 信其無」來驚kah gī-gī-chùn。
    人ê 命運mài 靠運氣,人ê 婚姻m̄-thang 相信八字,台灣新國家無beh hō͘ 外人統治,台灣國愛有家己ê 名,台灣人民愛有獨立ê 志氣。
轉去