台語華語辭典
台灣記憶
[轉去本站首頁]    [轉去台灣俗語鹹酸甜]

若beh 學問好,需要問三老 。

    Chit 七、八年來,認--ê 師父特別濟,有台文老經驗ê 前輩,李勤岸、陳永寶、陳明仁、陳豐惠、陳雷、呂興昌、張學謙、楊青矗、洪惟仁、鄭良偉、鄭良光kap 台語網ê 眾兄姊,蘇芝萌HOTSYSR 高手群,黃勁連,林央敏…等等,遮ê 先覺教我認bat 台語聲韻、台語文、彙音寶鑑、ㄅㄆㄇ、白話字kap 漢羅lām 寫、白話字輸入法,台灣俗語…嘛有基督教友ê 指示,宋澤萊ê 佛陀道理,hō͘ 我心安定,為著台文來扑拼。
    另外故鄉ê 序大老歲仔,有in 純正ê 台語,台灣ê 古早味,tàu 幫忙chiah bē hō͘ 台灣俗語鹹酸甜漏氣,老歲仔人記智上古芳 ,現代ê 資訊雖然m̄-bat 外濟,古早時代ê 孔孔縫縫 ,若m̄-bat,請教 in 就bē chhōe m̄ 著人,捷問 老大人,卡贏家己chhōe 資料歸半工。Bat 人卡好bat 銅,老歲仔人是回復台灣文化ê 向望。
    老實人bē 講hau-siâu 白賊話,若beh 問正經道理,問老實人一定無問題,in bē 曉烏講白,講m̄ 著去嘛bē kap 你gō͘-má-hoe 。若是kan-nā 有嘴súi,無實在gâu pûn 雞 kui ê 胡lùi-lùi ,千萬m̄-thang 請教chiah bē 食虧,學問beh 好,著愛好正道,若he o-lí-o-cho ,烏白話亂亂kô ,就m̄-thang tòe 伊sńg chhit-thô 。老實人講ê 道理m̄ 是真深,卻是可靠,bē hō͘ 人行去烏暗路。
    「若beh 學問好,需要問三老」,家己ê 學問m̄ 敢o ,不過家己會知,chit 幾年來有影有進步,這攏著感謝各位老經驗,老歲仔kap 古意人ê 指點,才hō͘ Siau, Lah-jih ê 經驗一日一日成長。
    「若beh 學問好,需要問三老」,研究台灣文化ê 三老,第一老是老經驗,第二老是老大人,第三老是古意ê 台灣人,有純正,有經驗,bē kā 汝騙,hō͘ 你sa 有總 ,學khit 來誠輕鬆。
轉去