台語華語辭典
台灣記憶
[轉去本站首頁]    [轉去台灣俗語鹹酸甜]

飼 囝卡快,飼父卡oh 。

    Hit 日轉去崁頂,聽講金吉仔兄、阿堂嫂--à,kap 力--à in 某阿珠,攏去tòa-tī 養老院,不止仔使人感慨。若金吉仔兄有卡莫怪,in hit-ê 孤後生 歹鐵仔 ,在來就浪浪溜溜,會kā 送去養老院已經算佳哉,若無,tòa tiàm 厝內,是beh ǹg 啥人 kā 伊奉待?Kan-nā 餓就去hō͘ 餓--死。
    抑若講阿堂嫂--à kap 阿珠--a,kā 送去hō͘ 人款待,實在誠無應該,in ê 翁婿雖然無tī--leh ,後生新婦、chau-á-kiáⁿ 囝婿歸大堆,論生活逐家攏bē-bái,食穿liōng-khùi ,出門轎車tī-leh 駛,beh 來款待chit-ê 無方便ê 阿娘,敢講無才調?倩一個人工侍候,做人囝兒新婦--ê,有閑就kap 伊開講phò-tāu,叫孫仔來sai-nai ,家己事業嘛顧會著,當然有小可卡無閒,小可無閒嘛是應該,敢m̄ 是?可惜,m̄--niâ lah !
    倩人工著開錢,侍候著時間,老人老番癲閣會kô-kô 纏,不如kā 送去老人院,無khòaiⁿ 著好,錢了人無代。哪會按呢?「飼囝卡快,飼父卡oh。」chit 句話m̄ 知bat 聽過?「飼囝無論飯,飼父母著算頓。」嘛是仝一樣,講做一位老人ê 無價值,現代老人ê 悲哀就是按呢。你、我、伊,逐家攏會老,逐家攏有份,食老敢正實著按呢老liân-hôe ,一定著hông 趕出家,恁chiah 不孝ê 序細--à,chit 個家曾經是恁父(母)ê,你按呢做,敢bē 傷過火,雖然阮心內怨慼,嘛是無奈何,m̄ 敢加講話。
    常在按呢想,父母疼囝是天性,囝孝父母是靠文化教養來維持,所以中國文化教咱著孝順,講hit-lō 百善孝為先,逐家掠有孝序大是真理,行孝道卡有款式 ,chit-mái ê 人重現實,啥物人倫義理,我ê 生活要緊,我ê 後生查某囝著教示,補數學,補英語,也beh 烘肉,也beh 學PC,無些不至 ,按呢才會得kap 人比,汰會有hit-lō 美國時間,侍候你──阿爸kap 阿母,你著原諒才是,攏是為著你ê 金孫玉孫,敢m̄ 是。
    Che .敢是天理?老人問題,請政府、國會議員兄弟,逐家著注意。
轉去