台語華語辭典
台灣記憶
[轉去本站首頁]    [轉去台灣俗語鹹酸甜]

屘仔囝屘tiu-tiu,無疼會夭壽 。

    「屘房出叔公」,hō͘ 人叫叔公,有人感覺真正sóng?M̄-kú若閣加kā thap 一句 「屘房嘛出衰微」,可能會hō͘ 你淡薄仔哀悲?這是按怎講?請你斟酌聽解說:
    Che tio̍h-ài 牽拖 唐山祖公chah 來 中國ê 歹風俗──封建思想。封建思想ê 遺毒有:遺產ê 處理原則,大孫ài 分一份。Siáng 是大孫?就是大囝ê 大後生,亦是捧斗孫 ,照中國歷史ê 講法就是嫡 長子嫡長孫。哪會講是歹風俗,咱來假設比論一個例,一個家庭若有五個囝,老父若死,財產m̄ 是ài 做六份分,大囝大孫就分兩份,按呢大房就分三分之一,二、三、四、五房,一房嘛chiah 分六分之一,免外久,三代人就好,財產ê 濟少大細一定天差lí 地 ,敢無影「屘房嘛出衰微」?
    因為chit 種無合理ê 傳統,hō͘ 台灣人囝孫m̄ 敢違逆,煞hō͘ 做阿公kap 阿媽--ê 卡疼大孫,疼hit-ê 捧斗ê 金孫玉孫,m̄-chiah 閣有「父母疼細囝,公媽疼大孫」ê 俗語出現。好佳哉,父母疼囝是天性,公媽無愛,只好父母家己愛,所以m̄-chiah閣講「屘仔囝屘tiu-tiu,無疼會夭壽」。
    屘仔囝hông 疼上濟--ê,Siau, Lah-jih 應該算上好運ê 一個,細漢歹命,五歲無老母,十九歲無老父,好佳哉頂有四個大兄,閣娶四個兄嫂,齊齊攏對chit 個歹命小弟惜命命, m̄ 甘伊做粗重工課,鼓勵伊讀冊,儉食儉穿,借錢hō͘ 小弟註冊,「屘仔囝屘tiu-tiu,無疼會夭壽」,序大人無thang chhiâⁿ 大漢,煞hō͘ 兄嫂牽成到會kap 人比 phēng,chit 款ê 福氣無teh chhōe,兄嫂ê 恩情hō͘ 人感心,兄嫂ê 感情愛保惜,長兄如父,長嫂如母,尊敬ài 有實際,體貼ài 親身表明。
轉去