台語華語辭典
台灣記憶
[轉去本站首頁]    [轉去台灣俗語鹹酸甜]

屘房 出叔公。

    Lah-jih-á 叔公,你閣beh 轉來教冊--à 是m̄!
    是啦!今仔日又閣是拜二,看咱庄裡遮ê 阿婆--à 阿媽chiah-ni̍h 認真,無撥工轉來敢會使chit。
    噯喲!Lah-jih-á 叔公,chāiⁿ-thang hō͘ 你按呢稱呼--neh,阮攏比你卡細輩,你按呢kā 阮稱呼都無beh 予阮折歲壽--kong?
    稱呼仔稱呼 ,抑無敢beh 叫恁「遮ê 查某人」,按呢實在有卡歹聽,無要緊啦!恁mài 應 著好。
    有影,tī 阮崁頂庄,蕭姓是大姓,大約佔八九成,蕭姓大公祖厝著起tiàm 阮庄內。庄內叔孫弟兄論輩行,光、昌、興、家、輔、國、奕…昌字輩ê Siau, Lah-jih,輔字輩、國字輩ê 親堂beh 按怎叫,有夠費心神。Chit-mái 風俗有卡變化,少年chit 輩有卡無大無細,除非兩三代內ê 至親,有leh 照輩稱呼,chhun--ê tn̄g 著頭kā 汝叫一聲叔爺,已經真功夫--a,其實tī chit-ê 人kap 人交陪lia̍p-chia̍p 又閣人情淡薄ê 社會,叔孫弟兄ê 稱呼,mài 閣tòa-hia 論輩無論歲leh 論bē 煞,嘛是無要緊,簡單稱呼一個叔爺,甚至直接叫名嘛無要緊,但是千萬m̄-thang 無仝輩分煞來稱兄道弟,就bē 使chit,按呢是會亂倫去。
    過去ê 父母,做人生囝,是無leh 節育,閣是早婚,會生生kah bē 生,大囝離屘仔kiáⁿ 一二十歲是誠普遍--ê,親像大兄就加我十九歲,細漢時若kap 大兄出門,in 朋友攏嘛講he 恁後生是--無?Chit-mái 大兄ê 後生kap 我出門,人又閣講he 是恁小弟是--無?按呢大房ê 大囝kap 細房ê 屘仔kiáⁿ,一代一代湠落去,莫怪「屘房出叔公」就無啥麼稀奇--lò͘,hông 叫一聲叔公,m̄ 是hiau-pai 事,叫人一聲叔公嘛m̄ 是去hông phiⁿ--去 ,人倫著顧,有大有細,社會有秩序,自然卡bē 糊塗,回復人倫道德,ùi 叔孫稱呼開始照步數,應該是上重要--ê。
轉去