台語華語辭典
台灣記憶
[轉去本站首頁]    [轉去台灣俗語鹹酸甜]

一分看別人,九分看家己。

    做人修養ê 分寸,應該注意--ê 是家己ê 品行舉止,有合禮數風俗,倫理道德無,千萬m̄-thang 一日到暗,kan-nā 注意別人ê 行為,好m̄ 好,著m̄ 著,按呢會hō͘ 你鬱卒bē 爽快,所以用「一分看別人,九分看家己」ê 原則來檢驗家己,提醒家己。並m̄ 是講叫咱只用一分ê 心意去關心別人,用九分ê 氣力來照顧家己。
    人是真自私真照顧家己--ê,所做所想攏嘛認為家己上著上讚,bē 堪得別人比咱卡gâu 卡khiàng 。看著別人頇慢,著hiau-pai chhèng-ku ,看著別人成功發達,就怨妒忿怒歸腹火,這實在是非常愚戇ê 心腸,所以beh 按怎來「一分看別人,九分看家己」做修養ê 功夫,就非常重要,下面提供幾句智慧言語,逐家參考,相及 鼓勵:
    l 一分心力看別人,九分心力看家己。按呢ê 修行 是適當--ê。
    l 修養是家己ê 代誌,你bē-tàng 叫別人ê 做法kap 你共款,合你ê 意。
    l 期待別人kah 你共款合你ê 意,會帶來家己ê 煩惱。
    l 批評比較,註定受苦。
    l Mài 評判別人,人各有特色,無需要揹 想beh 改變所有ê 人ê 包袱仔 。
    l 咱平常時攏hō͘ 家己ê 欲望、偏見、習慣kap 本能牽leh 行。
    l 平靜、清醒、無所執、無分別計較ê 心,自然充滿美德kap 慈悲。
    l 放下一切ê 爭辯,修家己ê 行,並敬愛周圍ê 人。
    l 修行是家己ê 代誌,無論做啥代誌,愛保持清醒kap自然。
    l 無論行、住、坐、臥 ,無管啥麼姿勢,攏愛斟酌觀察家己ê 身心,攏愛瞭解家己。
    l 智慧bē ùi 注意別人ê 過失中產生。
    願逐家消除貪、瞋、痴 ,認真做代誌,贏,bē hiau-pai,輸,bē 起àu-siâu 。
轉去