台語華語辭典
台灣記憶
[轉去本站首頁]    [轉去台灣俗語鹹酸甜]

一世人,親像做人客。

    抄一段挨大管絃唸唱ê 勸世歌hō͘ 逐家聽:
    草索長長…草索草索長長…牽kah 甘藷園…
    講到當今ê 世界,鳥為食亡人為財,想真人生著海海 ,死從何去生何來。
    咱來出世無半項,轉去雙手又空空,tòa chit 世間那眠夢,死了江山niū 別人。
    有--ê 出世有家伙,兄弟無量 起問題,想真做人那人客,轉去財產別人ê。
    做人m̄-thang gâu péng-pìⁿ ,tòa chit 世間無幾年,人若beh 死目一下nih,萬事免kap 人相爭。
    天下ê 人數萬千,領憑 出世在世間,亦有出世就免趁,亦有度日tō 為難。
    當今世事講bē 盡,富貴由命不由人,他人勸我我勸恁,命運無仝著愛認。
    平平雙腳kap 雙手,富貴兩字oh 得求,艱苦ê 人長歲壽,前世做來chit 世收。
    好bái 無teh thang 比phēng ,自恨閻王無公平,艱苦富貴三不等 ,有ê 著tòa 媽祖宮。
    註生娘娘註好好,算命改運敢有靠,未曾註生先註餓,由在天地去發落 。
    續落去換來聽Siau, Lah-jih ê 「該做就做,無煩無惱」歌:
    當今社會ê 病痛,為錢為權為名聲,好孔--ê 逐家相爭拚,拚kah 你死我無命。
    出世做人不得已,名色財利ko-ko 纏,若看bē 開真費氣,生死輪迴閣再ī 。
    有人出世好額人,嘛有hit-lō 歹命囝,歹命囝是怯生命 ,搶劫放槍有錢人驚。
    財產hiah chē 創啥貨,khǹg tiàm 厝內驚放火,chah tī 身軀會hông ge ,放hō͘ 序細起怨家。
    財產本是身外物,權勢若失起he-ku ,beh 死晉前後悔遲,beh 知嘛mài 已經輸。
    「一世人像做人客」,án-ni 思想 會後悔,茫茫渺渺罔得會,敢bē 怨嘆加giâ 枷 。
    人生可比旅行時,有人只有目的地,無看過程無顧尾,tn̄g 著歹sńg 就怨慼。
    一人著愛過一世,出門入門攏歡喜,天青落雨無傷悲,攏是自然ê 真理。
    人生是苦m̄ 是樂,生而為人相照顧,慈悲喜捨著愛佈 ,基督阿拉kap 佛陀。
    「一世人像做人客」,看你按怎過,
    你若想海海,著會使chit 亂使來,死了扑落地獄喝悲哀,是家己做得來。
    「一世人像做人客」,一目nih 仔就過了代,趕緊行善才應該,
    人生是不確定,死亡不可免,看會開,了脫生死回歸自然。
轉去