台語華語辭典
台灣記憶
[轉去本站首頁]    [轉去台灣俗語鹹酸甜]

年頭飼雞栽,年尾做月內。

    Chín ê 時代,hū-jîn-lâng 做月內,實在誠方便,beh 食雞酒補身體,店仔頭kōaⁿ 米酒隨時就有,雞仔鳥仔 市場據在你 掠,據在你買,thâi 好--ê 未thâi--ê,雞角仔雞nòa-á 在你揀,若貧惰嫌麻煩,猶有hit-lō 「做月內中心」 kā 你發落拴kah 好勢好勢,免像卡早按呢「年頭飼雞栽,年尾做月內」 著事先準備安排。
    三十外年前,大嫂beh 生屘仔kiáⁿ ,有身已經三kò月,為著beh hō͘ 大嫂月內卡phang-phài ,就開兩百外箍 買一岫 雞仔囝轉來家己飼,向望半年以後,會凍hō͘ 大嫂做月內,一日thâi 一隻雞仔,本來這是一點心意,啥知落尾煞攏hō͘ Siau, Lah-jih sut sut 去,thái 會按呢生?Hō͘ 恁ioh 看覓 !
    原來是按呢:斯當時tâⁿ-á 師範出業tī 學仔教冊,待遇無好,一kò月薪水才七八百箍,講beh 幫贊厝內ê 生活費用,實在誠有限,家己著hak 身穿,一身ê 打扮,手錶、鐵馬kap 所費,每一項支出著愛去薪水ê 一半以上,好佳哉校長叫我教升學班,為學生補習有淡薄仔所費thang 補貼,人講世間上無hit-lō 五月龍眼──pe̍h-hu̍t--ê ,有所得就有所失,為著補習,拚kah 一身烏乾烏乾,瘦閣薄板。一時大嫂看了誠m̄ 甘,就將hit 水 已經大隻ê 雞角雞nòa,兩工thâi 一隻,ho͘hⁿ 雞湯hō͘ 我食,食kah 面仔油滋油滋,身體健kah 那牛,自按呢月內ê 雞酒變做Siau, Lah-jih ê 肥chut-chut 。
    猶有,恁敢知?Siau, Lah-jih ê 阿嫂哪會chiah-nih 疼細叔,為著感心大嫂ê 疼愛,tī 遮講hō͘ 逐家知,長嫂如母,敬愛大嫂是該然,疼細叔像囝就無簡單,Siau, Lah-jih ê 大嫂就是模範。
    Siau, Lah-jih 細漢真歹命,五歲就無老母,攏靠大嫂kā 我chhiâⁿ,大嫂加我十九歲,我tâⁿ-á 四歲hit 年,伊嫁入阮厝內,隔轉年我阿母就來過身,放chit-ê 五歲囡仔,飼飯洗蕩,la̍k 屎la̍k 尿,就按呢交代tī 大嫂ê 身上,hit 年大嫂m̄-chiah 二十四歲ê 年紀,伊無嫌艱苦,無嫌chhōa 一個囡仔庀,也beh 發落一家三頓,煮食、洗衫、khioh 柴in 草絪 ,飼精牲仔兼chhōa 囡仔,chiah 無閒伊嘛m̄-bat kap 人哼慘 ,這就是大嫂ê 照起工,做人新婦實在無輕鬆。
    上天對我雖然有卡無平pāng ,不過真疼痛,chhōa 我老母上天國,卻送來一個仁慈ê 天使來牽教我大漢,無大嫂ê 疼愛,無大嫂ê 幫贊,今仔日ê Siau, Lah-jih 有可能m̄ 是按呢生。
    大嫂嫁來阮兜三年了後才生頭chiūⁿ-á 囝,所以三年來攏是跟隨大嫂tòe chiūⁿ tòe 落 ,掠做大嫂是老母,大嫂嘛掠chit 個歹命囝當作細囝leh 照顧,我吼伊著吼,我笑伊著tòe leh 笑,時時刻刻tòe tī 背後,tòe kah 入學堂了後,拄好大嫂生後生,才親像斷奶囡仔按呢離開伊ê 身邊,無leh kā 伊纏。雖然無leh 纏,大嫂疼我ê 心猶原無變,就是到chit-mái 伊已經beh 八十歲,共款kap 卡早按呢疼惜關懷。
    看著chit 句「年頭飼雞栽,年尾做月內」ê 俗語,引起三十年前ê 代誌,閣想著大嫂ê 恩情kap 義理,煞寫kah lô-thi lô-thi,因為大嫂ê 好,m̄ 知beh ùi 叨位講起。歹勢!歹勢!
轉去