台語華語辭典
台灣記憶
[轉去本站首頁]    [轉去台灣俗語鹹酸甜]

九月颱,無人知。(之二)

    Chit 擺ê Papisuh 風颱,正港--ê 是「九月颱,無人知」,無人知影伊會有外厲害,kan-nā 知影「風未到,水先到」,著hō͘ 基隆河閣作大水,hiau-hēng 汐止鎮ê 鄉親,短短十工內著忍受兩遍ê 淹水,原因一大拖,仙講嘛無卡cho̍ah,山坡地過度開發,合法無合法攏總來,che是天地teh 報應,只是報應tī 汐止人,有卡無公平。
    Chit-ê Papisuh 風颱,形成tī 13 工前,舊曆8月24 ùi 菲律賓東旁chiūⁿ 北 滾攪,到kah 9月初 4 暗風颱尾已經掃著台灣南部,氣象局提出警告,北部、東北部可能有大雨。初5消息,威力增加、速度減慢,離恒春猶400 km,雖然無直接chiūⁿ 陸 ,但是「風未到,水先到」,外圍環流帶來大量ê 雨水,初6報紙頭版新聞「芭比絲猶未到,汐止閣淹水」,「汐止閣淹水,居民無話問蒼天」,續落去就是各地災害報導,官員ê 關懷,民代、國會議員leh 追究責任,百姓leh 哀,啥人做tit 來,天做代,抑是人leh 崩敗!可嘆--à,可恨!金金看人leh 流目屎。
    「九月颱,無人知」,Papisuh 也無chiūⁿ 陸,煞斡 對台灣海峽leh kā 你遨,慢慢仔遨,遨kah hō͘ 人心狂火to̍h,初7(拜一)暗各縣政府發布停課免上班,害Siau, Lah-jih 天光早起,電話一直鼓,一直通知,「今仔日免讀冊,今仔日免讀冊」,啥知學生無來,老師逐家閒閒笑hai-hai,也無大風,也無大雨,一時煞hō͘ Papisuh騙m̄ 知,也無kā 咱通知講『我m̄ 來--ā!』
轉去