台語華語辭典
台灣記憶
[轉去本站首頁]    [轉去台灣俗語鹹酸甜]

人生百歲,七十者稀 。(人生七十古來稀。)

    「……聽見外面有人來,開門kā 看覓,月娘笑阮戇大獃,hō͘ 風騙m̄ 知!」這是望春風ê 歌聲,優美好聽,敢是收音機ê 放送,抑是khah-lah O.K ê 演唱?攏m̄ 是,是阮崁頂社區成人bat 字班ê 阿婆、阿媽leh 表演,逐家唱kah 歡喜kah,閣家己o-ló 家己m̄ 成猴,想bē 夠亦有chit-ê 機會chiūⁿ 台表演,攏是老師ê 功勞,來!阮敬老師一杯酒!
    九月tiang 涼 tī-beh 到,阮社區家己舉辦ê 敬老活動,提早tī 九月初五(拜六)舉行,由里辦公處、社區發展協會kap 庄裡廟寺合辦,經費家己ho̍at-lo̍h ,廟寺出6萬3,庄內青年捐23萬6,辦25桌chheⁿ-chhau,搭一個舞台thang 做節目、頒獎,恁敢知,阮庄內70歲以上ê 老人有外濟,106位,siáng 講--ê 「人生百歲,七十者稀」,長歲壽已經成做現代人ê 必然,老人ê 福利,老人ê 安養值得咱政府ê 重視,人生七十才開始,m̄ 是「人生七十古來稀」。
    慶祝節目除了辦桌以外,每一個阿公阿媽發1200箍紅包,另外猶有摸彩,鐵馬、電風、芳茶箍 …有人有份。大會開始,囡仔讀經班先用漢文音唸三字經,續落去是社區ê 土風舞、葵扇舞、太極拳,上蓋hō͘ 人o-ló--ê 就是長青bat 字班,阿媽阿祖級ê 學生唱台語歌謠,唱kah 笑bún-bún,落台了後,家己煞按呢講:m̄ 成猴,閣也 kap 人登台表演--koh。有學有效果,想起舊年taⁿ 開課,看in pì-sù pí-sù,想bē 夠有今仔日ê 春風跳弄ê 活力,社區理事長蕭萬福in 翁某ê 用心投入,排第一功勞,里長kap 阮幾個指導老師,嘛幫忙真濟。
    有一項hō͘ 阮想bē 曉--ê,是按怎阿公級ê 查甫人,攏無beh 參與遮ê 工課、學習,以後應該著注意推動,「人生七十才開始」,向望社區繼續經營,hō͘ 逐家tín 動起來,hō͘ 社區閣卡有活力。
轉去