台語華語辭典
台灣記憶
[轉去本站首頁]    [轉去台灣俗語鹹酸甜]

賣茶--ê 講茶.芳,賣花--ê 講花.紅。

    校長、各位主任、各位老師:逐家午安!
    咱台灣是一個多族群、多語文化ê 國家,有Hō-ló 人、客家人、原住民kap 新住民(外省人),通用tī 社會ê 語言有Hō-ló 話、客家話、九族ê 原住民話kap 北京語。
    Hō-ló 人講Hō-ló 話,客人講客話,九族講原住民話,新住民講in 原鄉ê 山東話、四川話、湖南話…攏是誠自然誠正常應該ê 代誌。
    一個多語文化ê 社會,為著促進各族群ê 和諧 交流,學會曉無仝族群ê 語言,是值得鼓勵--ê,對無仝族群ê 鄉親朋友,嘛是一種尊重。若是bē 曉講無仝族群ê 話語,當然使用北京語是上蓋方便--ê。但是千萬m̄-thang kan-nā 為著方便,煞來放sak 家己族群ê 父母話,父母話若無傳教hō͘ 咱ê序細,以後世世代代ê 囝孫,m̄ 知會變做啥款人ê 後代--lò͘!
    Chit 擺去板橋教師研習會參加客語研習,目的就是beh 了解客家人文化kap in-ê 語言,雖然才短短 6 工,bē 凍學著啥麼,但是至少嘛提供一個講客話聽客話ê 環境,會凍習慣客家人ê 交談方式,習慣聽in 講話ê 聲音。
    參加ê 老師攏總有40 個,其中有5個是Hō-ló 人,講解ê 教授、講師攏是客人,當in 知影有bē 曉講客話ê Hō-ló 人參加chit-ê 課程,攏感覺誠奇怪,嘛一直表示歡迎、o-ló kap 鼓勵,這就是人kap 人誠懇做夥ê 開始。
    上課中阮無反對in 講客話,in 嘛會tī 無容易瞭解ê 所在,用Hō-ló 話抑是北京語做補充,下課後ê 交陪,為著驚做阮聽無,大部分攏用Hō-ló 話開講,阮嘛利用機會kā in 請教講客話。「賣茶--ê 講茶.芳,賣花--ê 講花.紅」,其實m̄ 是蕭老師teh 『老王賣瓜,自賣自誇』,語言ê 重要性,由羅肇錦 教授講--ê 一個笑話,會凍小可證明出來:
    有一個Hō-ló 人朋友,用客語講「你是客家jîn」,伊感覺聽著bē 爽,就應講「你講我是客家jîn(仁),我嘛beh 講你是Hō-ló jîn(仁)」,逐家攏是土豆仁,細細粒仔,半斤八兩,攏無相phiⁿ。其實客話「人」ê 發音是「ngìn 」,m̄ 是「jìn」,因為發音m̄ 著,才來引起誤會,羅教授講這是一個笑話,m̄ 是真--ê。
    語言m̄ 但是溝通ê 工具niâ,伊嘛有語格,就kap 每一個人攏有伊ê 人格仝款,父母話是展現家己族群文化ê 靈魂,母語若失,伊ê 族群一定消失,平埔族ê 消失就是一個例。幾年來,小弟一直leh 推sak 台語,目的著是tī 遮,並m̄ 是teh 「賣茶--ê 講茶.芳,賣花--ê 講花.紅」--niā-niā。
    客語基本上分四縣、海陸二種腔口,tī 遮咱用卡濟人講ê 四縣腔來說明,真可惜,小弟m̄ 是語言天才,6 工中間,學無幾句會曉講--ê,今仔日會凍kā 恁紹介--ê 只有客語ê 音韻,hō͘ 逐家kap 小弟仝款,小可 來了解客家話kap Hō-ló 話到底有啥麼無仝ê 所在,下面咱著來講客語ê 聲母、韻母kap 聲調:(以下省略)
轉去