台語華語辭典
台灣記憶
[轉去本站首頁]    [轉去台灣俗語鹹酸甜]

九月颱,無人知。

    為著beh 學客語,專工去板橋參加教師研習會舉辦ê 客語研習班,鬥陣行--ê 猶有陳老師。阮tī 新曆10月12起程,來到板橋,已經beh 晝,報到了後去chhōe 分配ê 房間,五六個室友隨時開講khit 來:
    早起出門看新聞,講有一個風颱tih-beh 來!
    Che. 敢有可能?To 已經咱人8月22,看農民曆寒露已經過去,lio̍h-lio̍h--ah 霜降就beh 到,秋天尾哪有hit-lo 風颱?無可能ê 代誌。
    À 有che 無可能ê ?「九月颱,無人知」,你敢m̄-bat 聽人講過?雖然chit-mái 猶未到九--月,m̄-kú 你m̄-thang bē 記得,今年是閏雙五,論節氣,太陽曆10月初8是寒露,今仔日已經是12,beh 講太陰曆已經進入九--月,嘛無m̄ 著,「九月颱,無人知」,chit-ê 風颱會登陸無?實在m̄-thang 傷靠勢,猶是小心斟酌一下卡好。
    有影 串驚串著,『瑞伯』風颱ùi 輕度發展為強烈風颱,10月14下晡二點已經ùi 恒春登陸進入暴風圈,一場ê 災難大概閃避bē 過了。10月17禮拜五,各縣市攏放風颱假,板橋所在,風勢無大,阮tī 研習會內照常上課,實在會o-ló--chit ,『風雨無阻』、『處變不驚』,好親像啥人仔無tī 代 ê 款式。
    逐家利用歇睏時間拍開lajiouh ,無聽m̄ 知驚,聽了逐家起恐惶,夭壽 !Chúi-tńg-kha (汐止)已經變成水m̄ 轉腳,歸鎮浸tī 濁水底,bo̍k-bo̍k 泅;內湖崩山,有人被活tâi;…聽--à 聽bē 了,講嘛講bē 周至,總講一句,害liú-liú ,「九月颱,無人知」,到taⁿ 你才知?
    天光日,報紙pìn-piàng 叫 ,「瑞伯奪命,至少17死15失蹤」、「花蓮上慘,哀聲不斷,全台農作物損失19億」,哪會按呢生?風颱人人驚,財產會損失,人會無命,自古以來「九月颱,無人知」,實在厲害,因為失注意,無預防,才會受災殃。Chit-mái ê 時代,科技上厲害,風颱未到,消息已經知透透,beh 防備誠簡單,哪會損失kah 按呢生?Hō͘ 人感覺怪奇?其實講破誠簡單,人. 家己做得來,山坡地開發kah 傷厲害,水土保持做無好勢,崩山土石流攏是這個關係。
    「九月颱,無人知」,tī chit-ê 科技時代,已經m̄ 是使人驚惶ê 不得已,上驚--ê 是人. 無照天理,m̄ 是天無照甲子 ,是人非非擅做,對大自然過度開發ê 後果。
轉去