台語華語辭典
台灣記憶
[轉去本站首頁]    [轉去台灣俗語鹹酸甜]

天生地養(Thiⁿ-seⁿ tē-iúⁿ)。

    「感謝天,感謝地,感謝老母kap 老父,感謝作穡人,感謝生理人,感謝逐家!逐家寬寬仔食,ûn-ûn-á 哺,愛食hō͘ 清氣,m̄-thang 浪費,m̄-thang 食飯配話。」
    Che 是教學生食飯包前ê 感謝話,kap 基督教徒ê 祈禱仝意思,無仝形式。
    頂學期開始,學校就用心推動tī 學校內食中晝,避免學生離開校門,造成交通混亂,嘛防止學生tī 街仔路lo̍ah-lo̍ah sô ,養成歹習慣。
    推行效果bē-bái,chit 學期大部分ê 學生攏tī 教室食飯,為著照顧學生,家己kap 學生仝款tī 學校訂便當。做陣食飯是一項趣味ê 經驗,學生攏食kah 歡喜kah,有ê 食真慢寬寬仔sô ,有ê pe 真緊,kiat 一目nih 仔 著喝講食飽。看in 食飽,飯包殼仔 收集做一堆,順紲kā 檢查一下,才知真濟食無了,有ê 剩一半卡加,實在討債。
    下晡上課,利用機會kap 囡仔講「天生地養」ê 道理,食飯著感恩,著聽老師ê 話:
    各位小朋友!咱中晝做伙食飯真趣味--ho͘ⁿ,老師問恁,有飯thang 食,上愛感謝chiâ?
    「阿爸kah 阿母!」
    猶有…
    「阿公、阿媽!」
    猶有咧!
    「老師!」
    M̄ 著啦?
    「老師kā 阮訂飯包--a!」
    M̄ 是按呢講啦!咱食--ê 飯包啥麼做--ê?
    「米kap 菜!」
    米kap 菜ùi 叨來!
    「作穡人,農夫--a!」
    作穡人,農夫靠啥播田種菜?
    「老師!我知--a,濁水米kap 八堡圳。」
    著!濁水溪、八堡圳就是賜咱活命ê 水源,作穡人種作愛土地kap 水,生產農作物hō͘ 咱食,生理人做飯包hō͘ 咱方便,老父老母趁錢hō͘ 咱買飯包,所以咱代先愛感謝天地,咱攏是「天生地養」--ê,先感謝天地,才來感謝父母逐家,感謝ê 心khǹg tiàm 心底,以後食飯著m̄-thang 討債,平常時時羞仔 mài 食傷濟,正頓才食會loeh 。
    明仔載開始,中晝食飯愛同齊,先念一段感謝ê 話,才會使chit 食,chit-mái tòe 老師唸:
    「感謝天,感謝地,感謝老母kap 老父,感謝作穡人,感謝生理人,感謝逐家!逐家寬寬仔食,ûn-ûn-á 哺,愛食hō͘ 清氣 ,m̄-thang 浪費,m̄-thang 食飯配話。」
轉去