台語華語辭典
台灣記憶
[轉去本站首頁]    [轉去台灣俗語鹹酸甜]

月過十五光明少,人過中年萬事休。

    國小四年級上學期,自然科學第一單元是「觀察月亮」,che 是一個長期性ê 教學活動,課內根據課本先說明觀看月娘ê 方法,啥物時陣看?月ê 形狀生做啥款?有幾個拳頭母高?按怎紀錄?
    觀察月娘tī 天頂運行,是無簡單ê 一件事,月亮、日頭、地球ê 三kap 關係,加上時間ê 變化,已經是四度空間ê 問題,小小年紀哪有thang bat hiah 濟,姑不將為著beh hō͘ 學生卡會凍了解,先將「初三、四,月眉意;十五、六,月當圓;廿三、四,月暗暝。」chit 句俗語教hō͘ 囡仔暗唸,然後才每日交代愛看月娘ê 變化,約定每日暗時七點準時看,若看bē 著才閣chhiâu 時間 。
    看ā 看,盈暗已經八月半,學生攏知影盈暗月上圓,十五、六,月當圓,一年上súi ê 月娘就是chit-chūn。「月過十五光明少」,che 是大自然ê 循環,十五、六過了beh 看m̄ 是無月,是愛等卡晏 ,七點、八點一直徙、徙到暝半才來看,月影chhun 一半,繼續到月底,抑是後kò月月初,猶原有月thang 看,看你按怎看,用啥物角度思想。日--時看月真稀奇,有人m̄ 知道理,叫是暗時才有月,若是半暝仔看著月眉,抑是月光彩,惹起你--ê 是歡喜抑是悲哀,攏是人ê 心leh 作怪。
    朋友!你敢會因為「月過十五光明少」,引起你「人過中年萬事休」ê 怨嘆?月ê 光明濟、少是自然界ê 安排,人ê 一生過程,生、住、異、滅嘛是無奈何,咱ùi 細漢就一直期待將來,將來事業發展,風神hiau-pai,哪知中年一過了,有一工,半暝腳兜看著月娘缺一旁,煞雄雄想著家己ê 一生,人若會凍長生不老,不老長生m̄ 知beh 偌好,chiah 好ê 人生,食、穿、tòa 有,某súi、囝gâu,怎thang 予我一日一日老?「月過十五光明少,人過中年萬事休」,想著今年已經chiūⁿ-siap ,目睭花,體力小可lek--leh 就會呼雞bē pûn 火,想著心會chhoah 。
    會chhoah beh 怎樣?敢真正有影「人過中年萬事休」?四十ê 年紀有影人生去一半,四十應該是一尾龍,人生ê 巔峰,以現代ê 狀態,beh 貢獻社會猶有二三十年ê 期待,你敢知?奮鬥ê 人生,向望ê 未來,做人千萬m̄-thang 家己看衰bái,意志上重要,人生愛像賞月仝一樣,月當圓抑是月眉時攏是歡喜,才是健康ê 心理。
轉去