台語華語辭典
台灣記憶
[轉去本站首頁]    [轉去台灣俗語鹹酸甜]

M̄ 是九,就是十一。

    受著早當時政府「兩個拄拄好,一個無算少」ê 節育運動鼓勵,kap 世界ê 趨勢 影響,chit-mái ê 少年翁某,煞有影攏素氣素氣 生--兩個著好,有--ê 卡asalih --ê 生一個就喝chhé ,無tú-chhiān 生兩個攏是查某囡仔ê 時,上加閣生--一個,看會生著查甫囝無!Tī in ê觀念,生三個已經算真濟。
    生少ê 好處bē 少,母身卡bē 受損,身體健康閣會凍tòe 時行 ,bē 像過去in 父母hit-iân hiah 歹命。囡仔少ê 嘛卡好chhiâⁿ,時間金錢好安排,食、穿、tòa、教育就會凍卡頂真 ,beh 啥有啥,囡仔逐ê 疼命命,隨ê 看著哪寶貝,古早人講,「sēng 豬giâ 灶,sēng 囝不孝」,因果關係tī 遮,雖然囡仔chit-mái 猶細漢,大漢是m̄ 是會不孝猶m̄ 知影,不過現此時誠歹教示,卻是真--ê,一日kah 暗,m̄ 是食就是sńg,無著看電視扑電動玩具,讀冊寫作業chhìn-chhái 應付,父母ê 話哪teh 吹風,老師ê 話那像pûn 火,吹過無跡,pûn-hoa 就煞。
    Chit-mái ê 學生囡仔,天真有影天真,巧氣逐個都真巧氣,唯一缺點,個人主義,父母交代,老師教示,常常無beh chhap--你 ,你做你,伊做伊,老師教伊念歌讀冊,beh 死nā-hìⁿ ,無要無緊,老師若提醒叫伊大聲卡有精神,隨時大聲那狗吠,那雞leh 啼,「m̄ 是九,就是十一」;tī 厝內嘛共款,叫伊食飯著卡緊,伊 chhìn-chhái pe-pe 兩嘴,就去看電視,若是叫伊慢慢仔 pe,ûn-ûn-á 食,伊著嘴罔哺、手罔 ngiáu ,兩蕊目睭 siòng 別位,m̄ 是電視,就是戇神戇神,心內m̄ 知leh 想啥物?「M̄ 是九,就是十一」。
    「M̄ 是九,著是十一」,傷過磅,無夠氣,攏無thang 好,最好--ê 十全十美,十路chn̂g 是無簡單,見擺beh 做攏愛十分sè-jī,食,m̄-thang 大細頓,做,m̄-thang 貧惰嘛bē 使過勞扑歹身體。拄好著好,「M̄ 是九,就是十一」,m̄ 是好代誌。
轉去