台語華語辭典
台灣記憶
[轉去本站首頁]    [轉去台灣俗語鹹酸甜]

人比人,氣死人。

    創世紀故事內底ê 亞當、夏娃,因為食了禁果,才來產生分別心,分別查甫、查某ê 無仝,人間ê 苦楚、煩惱自按呢發生,苦慘ê 社會,擾亂ê 世界,無暝無日墜落烏暗ê 深淵。
    人有眼、耳、鼻、舌、身五官,狗嘛有,而且閣比人卡靈敏,但是狗比人卡無煩惱,原因tī 人有思想、意識,狗可能無,若有,嘛無人hiah 呢khiáu-khì 。有思想有意識,就會產生分別心,會曉分辨啥麼是好、歹,啥麼是真、假,啥麼是súi、bái,善、惡,gâu、頇慢,好額、sàn。有分別,著會扑拼beh 愛,啥麼酒、色、財、氣,啥麼名、利、財、勢,權利、慾望,攏beh 追求到手,攏是因為一字「比」,致使一生扑拼攏是為著財勢名利。
    追求財勢名聲,無一個底線,人心牛腹肚,卡濟嘛bē 滿足,「人比人,氣死人」,實在有影,阮後生考著成大,已經bē-bái,啥知恁查某囝考tiâu 台大,猶嫌科係傷bái,敢是leh 笑阮卡戇獃?In 查某囝嫁翁kah 100萬,轎車一台,阮後生娶牽手,聘金回 ,樓仔厝一棟,現金mài 講,銀行存款千外萬,隨嫁妝kah 過來,請恁看覓!!!「人比人,氣死人」,氣死無藥醫,siáng 叫你m̄ 卡kut-la̍t 趁錢,siáng 叫你m̄ 做好額人囝?比!比!比!kap 人比beh nî !
    比!比!比!比bē 了,有人比了會心酸,有人比了會歡喜?歡喜過後得著--ê 是啥麼?比不盡,不如家己比,今日比昨昏,chit-mái 比過去,日日有進步,日日有見財 ,逐日有teh 來,卡無敗害 ,心清無牽礙 ,歡喜自在。
    
轉去