台語華語辭典
台灣記憶
[轉去本站首頁]    [轉去台灣俗語鹹酸甜]

澎湖鳩鵻 ,無情。

    Che 是一句gia̍t-khiat-á 俗語,『歇後語是也』,簡單講著是講澎湖人無情。
    澎湖鄉親請你mài 受氣,講chit 句話m̄ 是刁持,早前著bat 講一句「澎湖查某,台灣牛」,澎湖、台灣攏是仝運命,無做無thang 食,beh 做空牢騷 ,只好出外求發展,咱澎湖kap 台灣本島,自古早就是移民ê 社會,唐山公唐山過台灣,心肝結一丸,規氣kap 咱ê 平埔族祖媽扑拼定根tī chit 塊土地,為著世傳世,閃法律縫 ,走chông 他鄉,攏是為著beh 過卡好ê 生活。
    咱攏知,澎湖tī 外海,四面是海,只好向海討一嘴食,tu 風浪 ,搧冬風 ,其他beh 靠土地耕作嘛是為難,到處石頭lōng-khōng ,閣欠活水,艱苦生活ê 澎湖鄉親,只有向高雄、台灣本島來chhōe 頭路,生活困難,哪有時間轉去故鄉關心,煞hō͘ 人叫是有影澎湖人卡現實,卡無親。其實台灣本島ê 鄉親猶原共款按呢無奈,出外人,若m̄ 是趁著家伙,啥人有hit-lō 面子轉去故鄉?
    澎湖到處是沙埔,沙埔出有真濟斑鳩 ,班鳩種類真濟種,有hit-lō 細號閣kó͘-chui 、súi 款ê 鳩鵻,掠著beh thâi 傷細隻,所以飼來看súi,當做『寵物』,可惜飼bē 乖,因為伊愛自由生活,無愛人kā 伊飼飽飽做chhit-thô 物,煞hō͘ 人牽拖鳩鵻是無情--ê,嘛是冤枉代一層。
    「澎湖鳩鵻,無情」,無情無義m̄ 是鳩鵻,嘛m̄ 是澎湖ê 出外人,為著生活、為著自由,啥人攏會為著家己ê 某囝想,敢m̄ 是?移民tī 海外ê 鄉親,敢m̄ 是kap 澎湖人仝一樣,為著無奈,為著理想,才著離鄉背井,你敢知有心ê 海外鄉親,是外呢思鄉為台灣ê 前途扑拼,親像為著推sak 台語文ê 濟濟有志,chit-chūn 攏猶tī 他鄉鬱卒teh 扑拼,「澎湖鳩鵻,無情」,咱看著--ê 是表面,chit-mái 一下趁有食,交通又閣利便,關心澎湖ê 鄉親,已經m̄ 是卡早按呢ê 無奈,hō͘ 人看做無親,hō͘ 人看做無情。
轉去