台語華語辭典
台灣記憶
[轉去本站首頁]    [轉去台灣俗語鹹酸甜]

暗昏 無叔孫,天光排字ûn 。

    Siau, Lah-jih 厝tòa Chhân-tiong-ng 崁頂庄 ,漢姓姓蕭,蕭姓祖廟就tī 阮庄內,過去歸庄差不多攏是姓蕭ê 叔孫,外姓ê 庄眾嘛攏有親成關係,m̄ 是hō͘ 阮姓蕭--ê 招 ,就是hō͘ 人抱來io --ê。所以自早崁頂庄ê 人著真和 ,真團結,古早有一句無kài-gōa 好 聽ê 話,講「賊仔崁頂人」,是ùi 賊仔卡猛人kā 彎話--ê,話是無好聽,卻是o-ló 卡濟,斯當時外圍仔人若聽著崁頂人,就m̄ 敢kā 欺負。
    另外猶有好家教,叔孫弟兄攏按輩分稱呼,真有大細,che 可能kap 漢文化有關係,論輩無論歲,到kah chit-mái 雖然人情世事卡淡過第六泡茶,卡chiáⁿ 過酒尾,m̄-kú Siau, Lah-jih 若是轉去崁頂庄,少年--ê 招呼一聲蕭老師,有歲--ê 卡照古例--ê,m̄ 是叫Lah-jih 叔,就是叔公、叔爺teh 稱呼,因為論輩分,小弟有卡佔kôan,ban 房 出叔公有影無錯,看族譜,ùi 唐山過台灣到taⁿ,(註:kap 平埔祖媽無關係),本人是屘囝,老爸嘛是排路尾,可是ban 房嘛出衰微 ,蕭姓宗親好額人,輩分beh 比 Siau, Lah-jih 卡kôan--ê 可能真少,che 就是漢文化封建思想ê 遺毒,大孫捧斗 --ê 財產嘛beh 加一份,按呢大房ê 財產著分兩份,大房若是卡奸巧,細房--ê 當然著去了了,che 是閒話,m̄ 是Siau, Lah-jih teh kheng-hun ,只是表明漢文化m̄ 是hiah 呢偉大。
    用招--ê ê 風俗著可能kap 平埔祖媽有關聯。細漢時就bat 聽講平埔番仔上愛kap 漢人做親成,漢人應該m̄ 是真漢人,是hō-ló 人才著,平埔番仔嘛m̄ 是番,是比唐山過台灣ê hō-ló 人閣卡早tī 遮徛起ê 平埔族,「有唐山公無唐山媽」,按呢咱ê 祖媽是誰?別人,Siau, Lah-jih m̄ 敢烏白講,Siau, Lah-jih ê 祖媽可能有平埔族血統,細漢io、抑是用招--ê,阮兜攏bat 發生。
    講著血統,煞bē 記得本題,「暗昏無叔孫,天光排字ûn」,究竟是啥意思?論輩無論歲,嘛著知影你是啥物人,按怎論,敢m̄ 是?天黃昏,無khòaⁿ 人面,tn̄g 著你,beh 按怎kap 你稱呼才是?人都看bē 清,稱呼就無法度正經,請諒解,若beh 論大細,叫你名抑是叫你阿伯,叔公、嬸婆攏總好,嘛著趁天光才來論,「暗昏無叔孫,天光排字ûn」,che 是一說,卡正經無議論。
    另外一說就真夭壽 ,無好看樣,是teh 警惕趁食查某 ,匿tī 暗bîn-bong ê 所在,為著生活做著見笑代,哪管伊是叨位來,熟似無熟似,有錢趁著是應該。有一工,一位茶店仔查某生理做了beh 送人客,hit 位查某囡仔姊按呢kap 人客講bái-bái :
    「老師!Chit 擺我招待,後擺才閣來!」害hit-ê 老師越頭kā 看覓,夭壽,夭壽,按呢beh 汰會使。見笑代,起腳拚命走,後擺m̄ 敢去hit-ê 所在。
轉去