台語華語辭典
台灣記憶
[轉去本站首頁]    [轉去台灣俗語鹹酸甜]

飯,會使chit chhìn-chhái 食;話,bē 使胡白講。

    頂禮拜,市內一間大間閣tòe 流行 ê 啥物名店,發生火災,柴枋仔 搭khit 來 ê 幾若間 小木屋,霎時 間化為烏有 ,火燒厝實在真可怕,「三年著賊偷,m̄ 值一年火ka-la̍uh 」,真正歸叢好好──無剉(錯)!
    發生火災ê 天光日 ,為著beh 強調火燒厝ê 可怕kap 囡仔sńg 火ê 危險性,利用生活倫理ê 時間kah 學生開講昨昏火燒厝ê 代誌,tú-chiah 講著火燒ê 消息,大部分ê 囡仔攏知影了了,大概是tī 學區內ê 緣故,小可ê 社會新聞,囡仔煞比老師知影卡頭前。
    經過情形講未煞,一個查甫囡仔隨應話:
    人講he 是頭家家己放火燒--ê!
    囡仔人有耳無嘴,m̄-thang 胡白講,會hō͘ 人搧嘴phóe--ō͘!
    老師!有影neh,人阮阿爸嘛按呢講!
    有影無影,攏無咱ê 代誌,「飯,會使chit chhìn-chhái 食;話,bē 使胡白講」。你敢知影意思?按怎火燒厝?原因tī 叨?啥麼人愛去調查?小朋友!知影ê 人giâ 手。
    警察!『警察伯伯』!
    著!He 是警察ê 責任,警察阿伯in 會叫人去調查,啥物人放火,啥物人犯法,咱bē 使chit 胡白ioh ,胡白牽拖 ,若無證據,chhìn-chhái 講人做歹,做犯法ê 代誌,he 叫做誣告 ,『誣告』ê 意思恁知影無!後擺m̄ 好 聽人講一尾蛇,恁就tòe 人講一尾sôa ,知影--bò͘!『小朋友』!
    食飯著m̄-thang 揀怪 ,逐項嘛好食,看恁中晝食飯包,有人揀東揀西,肥--ê m̄ 敢食,青菜阮無愛,一粒飯包食無一半著tàn-tàn hìⁿ-sak ,敢bē 討債人ê 物 ?Chit-mái 起,逐家聽老師ê 話:
    「飯,會使chit chhìn-chhái 食;話,bē 使胡白講」--chit,學校訂ê 便當攏有合衛生,好食歹食,攏著食hō͘ 了。『好嗎?』
轉去