台語華語辭典
台灣記憶
[轉去本站首頁]    [轉去台灣俗語鹹酸甜]

食魚食肉,也著菜kah 。

    食,第一重要是營養kap 衛生,逐家攏知影,營養包含卵白質、醣類、脂肪 、維生素 、礦物質 等,咱嘛知影遮ê 營養分存在tī 各種肉類、魚臊 、青菜內底,所以若beh 得著各種營養,取得平衡無欠點,逐項食物攏愛食,m̄-thang 食歸項,養成偏食ê 歹習慣,特別是對囡仔ê 教示,做人父母一定著斟酌。
    古早人食卡bái ,食物卡無富裕,三頓魚魚肉肉,食有chhun ê 人,人講真好命,散凶人tō 無共款,beh 食一塊肉一嘴魚,著愛pn̄g 神明抑是祖先ê 福氣,為著拜神明、敬祖公求保庇,才敢thâi 精牲仔來奉敬,然後才來家己祭牙槽王 ,好命歹命差hiah chē 。
    魚臊油分若傷濟,食kah 會起畏 ,chit 時就愛來che 青菜ê 口味,「食魚食肉,也著菜kah 」,che 著是老祖先平衡食物ê 祕訣,油臊食濟,kah che 青菜,食ám 糜仔配芥菜,嘛是一種享受。
    Chín ê 時代,靠科技ê 厲害,農業ê 發達,食,已經免分好額sàn,多數人營養已經過磅,「食魚食肉,也著菜kah 」ê 解說kap 過去已經無仝樣,食鹵肉愛kah 鹹菜甲,kûn 鴨肉、鵝肉lām 酸菜才有好氣味,酸菜、鹹菜kap 福菜煞變成chit-mái 料理ê 好時機,親像割包、肉包仔攏就靠這味,食了實在續嘴 。朋友!恁敢知影chit 款好氣味做菜底ê 鹹菜、福菜出tī 叨位?
    公路台一線,中部所在雲林縣斗南過去西旁hit tah 就是大埤鄉,出產鹹菜上有名,he 是用包心割菜 落去sīⁿ 鹽 ,一iân 一iân khǹg-tiàm 一kha 大kha ê 紅毛土 桶內,然後閣用一têng 塑膠布kā khàm 密密 ,面頂硩石頭,愈tiâm-cha̍t 愈好,鹽有脫水殺菌ê 功效,所以sīⁿ 好ê 鹹菜bē àu bē 臭 ,不過做chit 種工課真費精神閣食力,若是好價猶算bē-bái,若是價數bē 夠本,就誠m̄ 值。聽講過去sīⁿ 鹹菜ê 大桶是用松籮仔 柴做,m̄ 驚鹽sīⁿ,上驚日曝,若mài 曝日,用一百年嘛bē 害 ,因為歹照顧,chit-mái 改用紅毛土桶,可惜紅毛土驚鹽sīⁿ,著愛閣貼磁仔磚 ,beh 做chit 款桶著愛真師傅,若無擋bē 久。
    苗栗hit 旁ê 客人庄,in ê khòng 肉 參--ê 鹹菜叫做福菜,共款是用割菜sīⁿ--ê,人in 卡幼秀,khǹg-tī 磁仔做ê 甕仔 底,嘛是chiⁿ kah tiâm-cha̍t tiâm-cha̍t ,sīⁿ 好閣將甕仔顛倒khop ,che 有科學道理,按呢醱酵 ê 氣才bē 漏掉,增加風味,福菜、覆菜,就是按呢來,閣不止仔有學問。有福氣ê 人,咱來去客人庄食福菜,「食魚食肉,也著菜kah 」,beh 食晉前in 就kā 恁kah kah 好勢好勢,免恁家己麻煩,食好逐家才tàu 相報--heh!
轉去