台語華語辭典
台灣記憶
[轉去本站首頁]    [轉去台灣俗語鹹酸甜]

虎斑在外,人斑在內。

    台灣無出產虎,若真正看著虎,m̄ 是tī 籠仔內 看著,就是tī 動物園看著--ê,閣卡捷 看著--ê 著是tī TV頂峘 ,咬人bē 著,jiàu 人 bē 著,當然看ê 人攏看kah 笑bún-bún。
    虎!生做實在真súi,有雄威ê 外形閣有虎斑ê 花紋,有人愛伊ê 肉,有人愛伊ê 鞭 ,伊ê 骨頭,有人欣賞伊ê 皮,上高尚ê 人是欣賞伊ê 雄威,研究伊ê 生活型態,m̄ 管你是私心抑是自然心、平常心,beh kap 伊鬥陣抑是車拼 ,sè-jī 小心 一定ài 心頭定,因為虎會食人。
    虎會食人,人人驚,m̄-kú 虎真君子 ,tī 伊ê 皮外面劃kah 貓pih-pà ,自然界講che 是警戒色,先kā 你háⁿ 驚 ,上好你mài 惹--我,若無!予我起毛bái ,是會咬hō͘ 你血水仔ta̍p-ta̍p-tin,驚--人無?若看非洲ê 大莽園 ê 動物世界,就知影伊ê 厲害。
    虎厲害,其實人猶卡厲害,人ê 厲害m̄ 是伊ê 氣力,若beh 比氣力,人肉是虎嘴ê 食物。人厲害,厲害tī 伊ê 心,你ê 心內我m̄ 知,我leh 想啥你敢著會了解?各人有各人ê 思想,若m̄ 是害人ê 歹心烏lok 肚 是無táⁿ 緊 ,人若起拗蠻 ,beh 害人,伊bē 寫tī 面--裡,有當時仔閣會激笑笑,笑面虎beh 食人,愛知影笑面虎並m̄ 是虎,虎有虎斑在外,人斑tī 叨位?Tī 面--裡,tī 手--裡,â!He m̄ 是啦!He 是老人斑,少年人ê 烏斑柱仔籽,m̄ 是 歹心烏lok 肚ê 污斑缺點。
    人ê 心肝是紅--ê 抑是烏--ê,你敢看有?面chhiuⁿ 若未péng ,好人歹人分bē 清,所以害人之心不可有,防人之心不可無,因為「虎斑在外,人斑在內」,虎ê 厲害人人知,人ê 厲害暗密密 。
轉去