台語華語辭典
台灣記憶
[轉去本站首頁]    [轉去台灣俗語鹹酸甜]

先生緣,主人福。

    「先生」兩字,Hō-ló 話有人講sin-seⁿ,有人講sian-siⁿ。意思嘛有兩款,一款是尊敬醫生ê 稱呼,一款是尊敬老師ê 稱呼,嘛有人簡單稱呼做sian--ê(仙--ê),意思原在,感覺上閣卡有敬意。M̄ 信,你若tn̄g 著恁卡早ê 老師,抑是稱呼看病ê 醫生,你會用得叫伊『老師!老師!』、『陳醫師!』、『李醫生!』抑是直接叫伊「sian--ê!」看覓,就隨時感覺會出來。如果你真正是一個教員抑是醫師,閣卡感覺無共款。
    「先生緣,主人福」,本來是講患者看醫生,醫會好醫bē 好是愛看緣分,kap 醫生有緣,病入膏肓 ê 症頭 ,嘛會起死回生,sin-seⁿ 有影khiàng ,若是無緣,著是小可感冒、咳嗽 ,藥仔sian 食 to bē 利流 ,患者m̄ 敢嫌醫生,外人 m̄ 敢胡白批評,sian--ê 當然是閣開藥仔叫你閣再食看覓,「先生緣,主人福」,互相攏m̄ 敢見怪。當然現代ê 科技醫學治療就不在此限,m̄-kú 「先生緣,主人福」,患者kā 先生seh 紅包 ê 新聞,嘛不三時 有聽--著。
    閣來beh phò-tāu ê 議niū ,就是學校tú 開學tn̄g 著ê 問題,che 是逐年都有ê 代誌,「選老師」,當然是家長beh 選「名師」來教育in ê 序細。
    蕭老師!聽講X年級ê XX老師真gâu 教,有影無?
    事實咱學校ê 老師攏bē-bái!逐ê 嘛chiâⁿ-gâu 教!(等於白問)
    聽講X年級ê XX老師,學生收kah tīⁿ-tīⁿ-tīⁿ ,拜託蕭老師m̄ kā 阮孫--ê 創入去 hit 班。
    免啦!逐班嘛bē-bái,kah 是合格ê 老師,若有責任,逐個攏嘛真讚!(還是白問)
    聽講XX老師,足貧惰--ê,逐家嫌kah beh 臭屎--ì !
    Che 我m̄ 知影!恁家長ê 行情攏比阮卡清楚咧!(還是白問)
    蕭老師!哪會按呢講?
    好!蕭老師來講一個比論hō͘ 恁聽:
    選老師著那選醫生咧!按呢比論有卡無適當!M̄-kú 嘛小可有道理,叨一個老師好,好tī toeh ?叨一位醫師bái,bái tī toeh?做家長ê 恁了解外濟?猶m̄ 是聽人講--ê,假那tòe 流行仝款 ,只要mài 差傷濟著好,差傷濟--ê 用看就看會出來,若驚做看têng-tâⁿ 去 ,閣探聽一下就差不多--a。閣來囡仔讀冊讀了好無?就kap 看醫生仝款,「老師緣,囡仔福」!
    十外冬前,我 hit-ê 細漢囝beh 升五年--ê,重新編班,歸ê 家長亂操操,歸ê 學校嘛jû-kà-kà ,好朋友劉先生叫我kā chhiau-chhe̍k 一下 ,選一個仔名師教in 囝,小弟kā 講哪著煩惱hiah 濟,逐個嘛好,伊知影我ê 個性,路尾 伊kā 我講,伊beh 拜託議員,蕭老師ê 囡仔若編tī 叨一班,伊ê 囡仔著beh tòe 伊編hit 班,開學了後,結果煞無仝班。
    後來問伊是無夠力是無 ?伊講m̄ 是,伊探聽ê 結果:人阮囝in 老師已經師院出業,恁囝ê 老師chiah tng-leh 進修--niâ,beh 汰有時間thang 用心教冊--neh?講了不止仔有理,「先生緣,主人福」,「老師緣,囡仔福」!到此當今,chit 兩班ê 學生發展如何?無人hiah 用工夫去調查,身為當初時ê 家長,mài 講也罷!
轉去