台語華語辭典
台灣記憶
[轉去本站首頁]    [轉去台灣俗語鹹酸甜]

兩腳行,三腳勇。

    Che 是一層嚴肅ê 問題,查甫人愛聽,查某人嘛愛in 翁會行(sêng )。
    性學專家江萬火宣(soan)教授已經七十外,伊m̄ 是老不修,Siau, Lah-jih 卡少年beh 六十,嘛m̄ 是bē 曉想,胡白亂說胡白亂想。
    食色性也,無食哪會活,無性活動,哪會生湠 ?食是誠簡單,食好食bái 免人管,有衛生無衛生,有超過度抑是無夠營養,著愛家己節、家己顧,有人大嘴食肉,大嘴lim 酒,tn̄g 著痛苦病痛就家己認命。(病從口入)
    只是 chit-ê 性kap 愛,有真濟人lóng 分bē 清,尤其是查甫人,講著性、色著笑微微,kan-nā 笑笑過去猶無要緊,上驚--ê 著是迄款chheⁿ 狂狗 性質,想--著著beh,轉去亂伊俺某是kan-nā in 某leh hō͘ 伊創治 ,若是起悾憨 ,亂亂來胡白是 ,真真正正害人害自己,色--字害人,當今ê 社會是滿滿是。
    閹掉m̄ 是辦法,thun-lún 忍耐敢bē 鬱卒?有智慧ê 人靠修養,培養藝術hō͘ 伊昇華,普通人只有去開 查某化消心悶,若tn̄g 著生理、心理有歹去ê 人,聽講著威而剛就興chhih-chhih,嘛m̄ 管伊有事實抑無事實,買買食食落去才來論有理也無理。
    其實講著chit 款ê 代誌,江醫師講了上有理,人伊講:「兩腳行,三腳勇」,哪著啥麼仙丹藥單,意思就是叫人多運動,兩支腳若捷行 ,身體自然勇壯,查甫人上煩惱ê hit 支第三支,江醫師講一定一tó͘勇 ,人伊講in 翁仔某仔tàu tàu--leh 嘛百外外 ,雖然m̄ 是定定是,m̄-kú 嘛不時就笑bī-bī,che 攏是「兩腳行,三腳勇」ê 功用,醫生人bē kâng 騙,恩愛ê 翁某,有愛ê 夫妻,趕緊,趕緊去運動,罔行罔講,罔笑罔chông,生活快樂,身體健康。
轉去