台語華語辭典
台灣記憶
[轉去本站首頁]    [轉去台灣俗語鹹酸甜]

親扑親過,親無仇。

    親是親人,至親,有血緣--ê,共爸共母,抑是共爸各母,共母各爸攏是親,當然上親--ê 是爸仔囝、母仔囝ê 關係,閣來是親兄弟、親姊妹,同胞兄弟姊妹;猶有一款比che 閣卡親--ê,就是異卵 雙胞胎,抑是同卵雙胞胎,就是講共卵--ê 雙生仔囝,kap異卵--ê 雙生仔囝,有親--無?蓋成 照鏡看著--ê 仝款,有當時仔連in 親生父母都分bē 清楚。
    既然是至親,都那家己 ,應該bē 冤家觸khê 才著,m̄-kú he 是講道理ê 話題,事實上並m̄ 是hiah 呢單純,嘴kap 舌上親,都會咬著,親兄弟哪有he bē 冤家?人講姊妹仔狗,兄弟比拳頭,有時意見bē 合,冤冤觸觸咧 ,懊面賭氣 ,拳頭母爭爭鎚鎚咧,攏嘛會來發生,其實che 是囡仔學做人ê 本領,兄弟bē 合,姊妹相觸,明理ê 父母實在m̄ 免傷煩惱,傷過干涉,若mài 過分,觸來觸去,尾仔猶m̄ 是親兄親弟,阿姊!阿姊!小妹!小妹!叫bē 離,哪會按呢生?道理誠簡單,「親扑親過,親無仇」,人講扑虎掠賊,猶是親兄弟,共血緣共模印--ê,敢有人因為一支腳一支手傷歹看相,煞來kā 啄掉tàn hìⁿ-sak ê 道理?仝款「親扑親過,親無仇」,兄弟姊妹冤家攏是會,但是bē 因為冤家勞績煞來結冤仇。
    當然世事oh 講 ,親兄弟親姊妺,冤家kah 無來往,見官司、giâ 刀仔相tu̍h 嘛是有,總是he 是異類 ,m̄-thang kā 看做正常ê 理由。
    朋友!Tng 恁兜ê 序細leh 冤家,冤kah 不可開招 ê 時陣,用chit 句俗語來苦勸一定有路用,「親扑親過,親無仇」,冤冤過,就煞煞去,才是好子弟。
轉去