台語華語辭典
台灣記憶
[轉去本站首頁]    [轉去台灣俗語鹹酸甜]

日--時布袋戲,暝時搬歌仔戲。

    翁某是合股ê 有限公司,時機若好,hi-hi ha-ha,啥麼都免計較,時機若bái,冤家勞績 ,鬧beh 分離。
    翁親某嘛親,親一下過度,煞害老公婆仔拋車lin (躪) ,若是tn̄g 著意見bē 拄好,互相tu̍h-khùi ,三日m̄ 講話是常事,所以人按呢教示--人,翁仔某代上bē chhap 得 ,為著翁去勸大嫂,為著某去勸大哥,人聽會入心講你是好朋友,有情ê 兄哥,若是一時無小心,講m̄ 著話,得失 著阿兄抑是大嫂,人昨昏in leh 床頭扑,今仔日人in leh 床尾和,tng-leh 好 ,hông 罵--ê hông 蹧躂--ê 是你chit-ê 戇giàn 頭 (thô ) 。
    床頭扑床尾和ê 翁某,可能是前世人相欠債,m̄ 管是翁扑某,抑是某扑翁,有理無理卡按怎講攏m̄ 好。嘛有hit-lōe 翁生某旦 ,m̄-kú 人閣bē kan-nā 食飽相看niā-niā,人閣真 gâu hōaⁿ 家 ,事業做會好勢,顧囝那命,有孝老父,sai-nai ta-ke ,按呢ê 翁某才是現代ê 模範夫妻。
    上蓋趣味,上蓋世俗ê 夫妻,應該著算「日--時布袋戲,暝時搬歌仔戲」ê 翁仔姐 牽手,日--時鬥陣那朋友,有講有笑,有kiāu 有chhoh ,beh 詈 beh 罵攏無要緊,歡喜ê 時陣答嘴鼓,若起冤家ê 時陣就līn-lōng-chhāⁿ ,人看是sià 世眾 ,m̄-kú in 家己感覺真趣味;散工了後,轉轉去,朋友煩惱in 會冤家無時了,明仔載m̄ 知影beh 按怎收山 ,敢會閣來放伴做 穡頭?
    朋友!代誌演變恁敢知影?你看in 青天白日,冤家勞績,人暗頓食飽,身軀一下洗,日--時ê 戲beh 換齣,鐵公雞ê 布袋戲,beh 來換唱歌仔戲,枕頭弦 一下挨,tin-tin tiang-tiang,iⁿ-iⁿ oaiⁿ-oaiⁿ,連鞭好勢,睏bē 到天光,人又閣是一對歡歡喜喜ê 翁某夫妻。
    「日--時布袋戲,暝時搬歌仔戲」ê 翁仔某,實在趣味,世俗夫妻,你講好勢抑是歹勢?家己斟酌,也無做歹,歡喜著好,chhap 人hiah 濟?
轉去