台語華語辭典
台灣記憶
[轉去本站首頁]    [轉去台灣俗語鹹酸甜]

貓仔無tī--leh ,老鼠仔 著會蹺腳。

    台灣人leh 算年代抑是算年歲,古早攏用鼠、牛、虎、兔、龍、蛇、馬、羊、猴、雞、狗、豬這十二生相 來推算。相命仙--ê beh 相命,看好日 娶新娘、拜天公,牽風水--ê 看日課 ,攏嘛愛問主人家主角、配角ê 生相,thang 好揀吉日,才bē 犯沖。
    chiah-ê 出生年月日,仙--ê 定著按呢問:你相啥?叨一kò 月叨一日幾點生--ê?然後仙--ê 才屈指妙算 ,講你是民國幾年生--ê,抑是講he 甲子、乙丑、丙寅啥物年出世--ê,伊 chit-ê 屈指妙算,著是hō͘ 你信kah 真真ê 撇步 ,m̄-chiah 有人按呢phí-siùⁿ àu 仙--ê leh 騙食念--ê 是子、丑、寅、卯、木 sat 、蟉蚤 ;辰、巳、午、未、pa̍t-á 、紅柿 。Ah 抑是鼠、牛、虎、兔、貓;馬、羊、猴、雞、狗、豬。相命嘴胡lùi-lùi,嘛是誠笑詼ê 代誌。
    鼠、牛、虎、兔、貓?奇怪?厝內ê 貓仔哪會無tī 十二生相在內--neh?這有一個十二生相ê 故事ê 典故:
    眾動物為著beh 得著排生相ê 機會,逐個攏真扑拼探聽消息,扑拼走chông beh 提著第一等,tòa-tī 人厝內 ê 貓kap 鼠,本成是好朋友,就是因為chit 擺ê 盛會,niáu 鼠仔煞無將 chit-ê 好消息報貓仔知,害貓仔失去kap 人排生相ê 機會,自按呢伊兩個結了大冤仇,見擺 貓仔若看著niáu 鼠仔,一定m̄ 放伊干休,niáu 鼠仔見若看著貓,嘛一定走kah phùn-kheng 去 。
    故事講完,咱來看一件新聞,聽講chit 擺台中市長張溫鷹出國期間,市府大大細細ê 員工上班攏誠正常,kap 平常時仔共款,這實在著給in o-ló 致敬,民主時代,公僕為百姓服務辦公事,本來著是依法照辦,哪著市長有tī-leh 監督才beh 做--neh?親像卡早按呢,「貓仔無tī--leh,老鼠仔著會蹺腳。」按呢,若tn̄g 著做主管--ê 一日走 pha-pha ,iah 無in ê 機關,辦公廳m̄ 著駱駝--ê 駱駝 ,溜--ê 溜--ê,買菜--ê 去買菜,看股市場--ê 去看股市。公務人員公開去舞家己ê 錢元,若按呢 chit-ê 社會注定腐敗,食虧艱苦著--ê 註定是咱ê 戇百姓。
    台中市政府有chit 款民主素養,照步來ê 員工kap 市長大姊,小弟tī-chia 尊敬恁,向恁敬禮!
轉去