台語華語辭典
台灣記憶
[轉去本站首頁]    [轉去台灣俗語鹹酸甜]

一人行一路。

    師範學校出業到taⁿ,已經三十六冬,三十六年ê 教師生活,講短無短,講久嘛界成無外久,只是ùi 少年時代教到老歲仔--niâ,Siau, Lah-jih m̄ 敢講是一位犧牲奉獻,奉獻犧牲ê 教育者,kan-nā 是一支死瞪瞪ê 烏枋杙仔 ,無變竅,只有奉公守法,頇慢就頇慢tī 伊m̄ 是一位教育界ê 逃兵,好kāng bái ,總是老老實實教冊教了三十六年,講無功勞嘛猶有苦勞。
    三十六年前畢業ê 惜別會,有同窗--ê 按呢講:chit-mái 開始咱攏是國校ê 老師,分散tī 台中、彰化、苗栗、南投、雲林chit 箍圍仔,雖然講是「一人行一路」,三不五時beh 相chhōe 並m̄ 是困難代,總是攏tī 教育界leh 扑拼,出差、研習,相tn̄g 著ê 機會應該bē 少;m̄ 過過十冬了後,著驚矣無扑算--lò͘!定著有人會轉業,三年後繼續升學去讀大學,亦是參加高普考換頭路,小小ê 教冊飯碗,哪有可能縛會tiâu 飛chiūⁿ 天ê 願望?
    話猶khǹg-tī 耳仔邊 ,三十六年ê 變化真正濟,有人去做法官,有人做教授,大學學校長,鄉鎮長,嘛有人經營生理場,做董事長,有人已經退休,有人無煩惱免憂愁,看破凡塵轉去天國歇睏,留tiàm 國校認份教冊--ê chhun 無幾ê,雄雄越頭看,才發覺三十六年後ê 今仔日,實在有影「一人行一路」,一sut 仔都無錯誤。
    人生海海,世事變化無常,啥人結緣,啥人相礙,人生ê 無一定,m̄ 是咱會凍做自裁,m̄ 免看破世情,嘛m̄ 免為世事悲哀,ùi 頭來無可能,向望將來敢有法(度)?總是把握chit-mái 才應該,mài 講已經是老歲仔,無啥物thang 好做!嘛m̄-thang 食老m̄ 認老,不時都beh 展詼諧展厲害 。
轉去