台語華語辭典
台灣記憶
[轉去本站首頁]    [轉去台灣俗語鹹酸甜]

燒môai 重菜,súi 某sńg 囝婿 。

    食色性也!貪食是多數人ê 本性,講著食就爭破額,除了厝內三頓,街路面,逐四界kā 看覓,食--ê 生理猶是上好做,路邊擔仔,黃昏市仔,攏是食無停睏,鬧熱滾滾。貪色是查甫人ê 大趣味,講著查某色迷迷,豬哥神,kan-nā 講『威爾鋼』就hō͘ 新聞記者寫bē 了,電視報bē 離。
    古早人每日扑拼第一重要--ê 是為著食,民以食為天,食hō͘ 飽才有時間氣力來關心其他ê 工課。食,重要--ê tī 三頓ê 主食,糜飯 若chhôan 有夠額 ,配菜 chhìn-chhái 著好,鹹tôa-á 、醬筍、奄瓜仔、菜頭long-á,菜脯、魚脯仔、蝦仔kê,攏是配會落飯ê 菜配,但是你m̄-thang 想講he 是粗俗ê 物件,tī 古早時代猶原愛儉儉仔配才會使chit。
    食三頓,菜傷傷(siuⁿ-siong ),傷量 siōng,he 是誠犯嫌 ,發落羹頓 ê 阿母會雜雜念,菜chiah-n…h siong,beh 叨位補償?啥麼時陣上siong 菜你敢知?著是食燒糜ê 時陣,「燒môai 重菜」,免解說著會知,燒糜燒燙燙,beh 落喉著會加配真濟菜,落尾食ê 人著會喝無菜,偌心酸你敢知?
    「燒môai 重菜,súi 某sńg 囝婿」,beh 警告--人ê 是後壁chit 句上厲害,tú 娶某ê 少年人,抑是婚姻美滿ê 中年查甫人,請恁斟酌想看覓,súi 某súi tang-tang,(續落hit 句m̄ 是褲底破一孔leh 扑la̍h-liâng ,)好看好sńg 好tín 動,若按呢就有影會害死人,色字頂頭一支刀,傷捷會過癆(勞),雖然m̄ 是外遇,m̄ 是邪淫,總是酒色過多就m̄ 是好代誌,夫妻恩愛,相好著適可而止,你無聽人講,「súi 某sńg 囝婿」,著是因為bē 曉節制,才有chit 句俗語kā 咱提醒,請你、我著注意,才bē 損著家己ê 身體。
轉去