台語華語辭典
台灣記憶
[轉去本站首頁]    [轉去台灣俗語鹹酸甜]

苦瓜連根苦,甜瓜透蒂 甜。

    改寫一個佛教因果ê 故事:
    種子kap 果實 ──Siau, Lah-jih 改寫
    種啥物因,得啥物果。栽啥款ê 種子,得啥款ê 果實。有啥物款ê 行為,就會得著啥物款ê 結果。
    有一個作田人tī 共一坵田裡tiām 兩粒種子:一粒是甜瓜ê 種子,另外一粒是苦瓜ê 種子。兩粒種子種tī 共款ê 田土內,接受共款ê 水分、共款ê 日頭光、共款ê 空氣;大自然hō͘ 伊共款ê 營養分。兩粒種子ùi 土腳兜puh-íⁿ ,而且開始成長,結果按怎?苦瓜欉生ê 苦瓜是苦--è,連伊ê 根攏是苦teh-teh 。Ah 甜瓜欉生ê 甜瓜,m̄ 但甜瓜粒是甜--e,連伊ê 蒂頭攏是甜--e。為啥物大自然(抑是啥物神)會對一個chiah-ni̍h 仁慈,卻是對另外一個hiah 呢殘酷 neh?
    無!無!無!大自然並無無仁慈嘛無殘酷,一切攏是按照固定ê 法則來運行,大自然只是幫助種子呈現伊ê 特色而已。所有ê 營養分kan-nā 幫贊種子顯示伊家己ê 本性。甜瓜有甜ê 特性,所以甜瓜是甜--e;苦瓜ê 種子有苦ê 特性,所以苦瓜是苦--è。種啥物款種子,得啥物款ê 果實。
    若是chit-ê 作田人行到苦瓜欉ê 邊--a,對苦瓜欉行三個禮,而且se̍h 108 liàn 來表示敬意,閣用鮮花、束柴、臘燭、水果、點心來奉敬。了後,伊開始祈禱乞求 :「啊!苦瓜神--à、請你生甜瓜好無!我beh 甜瓜啦!」可憐ê 苦瓜神、伊無法度生甜瓜hō͘ 你,伊無chit 款能力。
    若是有人想beh 得著甜瓜、伊必須ài 種甜瓜ê 種子,按呢伊就m̄ 免去哀求任何人來幫贊,伊所得著--è 一定是甜瓜。種啥物種子,就得著啥物款ê 果實。「苦瓜連根苦,甜瓜透蒂甜」,這是必然ê 果報。歹命人講好命人真好命,敢有影?好命人看歹命人真苦憐,敢有一定?好命、歹命?Kah 在人ê 心按怎去體會,人若有法度用平等ê 心去對待苦kap 樂,無執著ê 心,管汰伊「苦瓜連根苦,甜瓜透蒂甜」已經是無重要--à。
    咱ê 障礙、咱ê 無知是:咱對種啥物款ê 種子無要無緊,所以時常去種著苦瓜ê 種子,但是到收成ê 時陣,咱chiah 突然警覺,咱愛--è 是甜瓜,m̄ 是苦瓜。結尾,咱開始哀求,希望會得著甜瓜,ài 知影,he 是無卡cho̍ah--è。
    「苦瓜連根苦,甜瓜透蒂甜」,免怨嘆,這是因果,這是法,大自然ê 法則,啥人都bē gâu--tit ,歡喜做,甘願受,心內無憂愁,hit-ê 時陣你已經悟道--ā。
轉去