台語華語辭典
台灣記憶
[轉去本站首頁]    [轉去台灣俗語鹹酸甜]

人生人疼 ,狗生狗疼。

    常聽人批評女性ê 弱點:上自私,上無量,而且萬連翻 、番pì-pà 。
    Chit 款ê 論點Siau, Lah-jih 非常無同意,無同意ê 所在並m̄ 是teh 否認查某人ê 自私、無量 、chau-á 人 番ê 本性,是無同意講遮ê 本性是查某人ê 弱點。
    因為自私、無量,伊chiah 會顧囝那生命,因為伊萬連翻、番pì-pà,chiah 會為囝付出無窮無盡ê 愛心勞苦,自私、無量,萬連翻、番pì-pà,實在講chiah 是母愛偉大ê 天性,「人生人疼,狗生狗疼。」母愛ê 付出,無惜代價,無求報答,除了宗教家以外,kan-nā 老母做會夠--niā-tiāⁿ,你講著m̄ 著。
    「人生人疼,狗生狗疼」chit 種母愛ê 鏡頭,ùi 非洲大莽園 ê 自然社會,動物世界ê 影片上,看去上分明,無論天頂ê 飛鳥,土腳ê 蟲thoa ,山裡ê 猛虎,水裡ê 魚蛇,生卵--ē,生囝--è,兇kài-kài --è,sô-siâu sô-siâu --ē,無論叨一種動物,照顧in 初生ê 幼囝,攏是疼kah 那命。
    「人生人疼,狗生狗疼。」隨人ê,隨人好,是顯示母愛ê 偉大,你看動物世界母囝關係,雞母為著雞仔囝,敢kap bā-hio̍h 輸贏,貓母為著貓仔囝ê 安全,無惜艱苦麻煩一直徙岫,狗母顧狗仔囝兇kài-kài,猴母顧猴仔囝惡khia̍k-khia̍k ,隨人ê 囝,隨人惜命命。
    「人生人疼,狗生狗疼。」這是天性,這是自然法則,m̄-kú chit 種母愛ê 表達,一般動物kap 人小可無相像,自然界ê 動物疼囝,顧到伊會獨立生活為止,一旦責任完成,就放hō͘ 出在伊去 。人,就無共款,只要老母tī-leh,母愛永遠存在,母愛ê 永遠存在,有好有bái,好ê 感覺是享受溫暖,bái ê 感覺是縛腳縛手,嘴講疼囝,實際是自私,有一工,tn̄g 著囝不孝,hit 種感覺有影真夭壽 。
    人,哪m̄ 去學動物,該愛就愛,該放手就放手,大自然ê 母愛chiah 是自然ê 法則,順其自然,培養平等心,充滿喜樂,心內無憂。
轉去