台語華語辭典
台灣記憶
[轉去本站首頁]    [轉去台灣俗語鹹酸甜]

大箍人,好看頭。

    126 公分kôan,26公斤重ê 體型,若是讀國小一年仔m̄ 差不多。講khit 來你m̄-thang 笑,he 是Siau, Lah-jih tī 四十幾年前,讀國校六年--ē ê 數據,有夠矮,有夠瘦,有夠小細,每kái 若排列,攏是尾仔算倒轉來第二個,所以在來 就誠欣羨lò 腳閣大箍pé ê 人,一直認為「大箍人,好看頭」,逐項攏佔贏 。
    我ê 老爸比我ê 老母卡矮,我ê 體型sêng 老爸,頂面四個阿兄sêng 老母,大箍pé 漢草好,特別二兄lò-sia̍k-sia̍k ,人攏叫伊lò 腳來--ē,常常跟隨tī 阿爸ê 身邊學雜chhò 仔功夫 ,做若bē 好勢,阿爸就罵伊大箍呆,其實二兄ê 工手 真讚,無論剖篾仔,ut 竹椅,做畚箕抑是箍桶、戳孔、khàm 厝頂…只要伊親手做,人人o-ló。
    細漢常常唸一首大箍呆ê 童謠,定定去kap 二兄連做夥,「大箍呆,炒韭菜,燒燒一碗來,冷冷阮無愛…來來來,大箍呆,卡緊炒韭菜…」,唸久,連久,煞成自然,大箍不利呆ê 觀念,自按呢深深印tiàm 腦海,chit 種習氣有夠têng-tâⁿ ,「大箍人,好看頭」ê 欣羨,煞變成看m̄ chiūⁿ 目 ,講卡現實咧,就是將大箍人看做戇戇槌槌迄款,實在無應該,「習氣」 對人ê 影響力有夠大,講khit 來有夠可怕。其實,人不可貌相 ,體格大細,面貌ê súi bái,kap 人ê 聰明、智慧並無直接關聯。
    朋友!M̄-thang hō͘ 偏見變成蜊仔肉,糊著目睭猶m̄ 知影,你有偌濟「習氣」leh 影響著你ê 日常生活,你bat 斟酌過無?一分看別人,九分留leh 看家己,慢慢著會減少偏見。
轉去