台語華語辭典
台灣記憶
[轉去本站首頁]    [轉去台灣俗語鹹酸甜]

嘴舌無骨,反出反入。(人嘴,上毒)。

    佛陀教導ê 八聖道正語、正業、正命、正精進、正念、正定、正思惟、正見,分做戒、定、慧三部份,葛印卡大師 kā 講做是道德修養、培養注意力kap 智慧ê 訓練。智慧ê 開發需要持戒kap 修定做基礎,任何想beh 修持正法ê 人,攏ài 持五戒作為道德行為ê 基本要求。
    雖然chit 次參加ê 十日內觀禪修ê 重點是tī 修定kap 智慧訓練ê 親身體驗,不過戒ê 部份猶原真受重視。主辦單位代先講明,來遮禪修一定守五戒,戒殺生、戒偷盜、戒妄語、戒邪淫 、戒飲酒毒品,事實上tī chit 種有計劃ê 安排之下,守五戒應該無啥問題,唯一困難--ê 是戒妄語chit 項--niâ,你敢知影beh 用啥物辦法來提醒約束學員守口業,mài 烏白講話?In 用ê 方法真簡單閣誠有道理,規氣 叫阮mài 講話,嚴格「禁語」,話若無講,自然無啥口業thang 造。
    講嘛有道理,人ê 「嘴舌無骨,反出反入」,ài 講啥就講啥,beh kā 汝擋嘛是無彩工敢m̄ 是?「人嘴,上毒」,若是tn̄g 著ài 「生言造語」ê 多端人,一句無妥當ê 話可能帶來禍端,惹來人心不安;卡無礙人ê 談天說地,猶原hō͘ 人心情táⁿ-hiáⁿ ,影響修行ê 寧靜,結果十工ê 禪修,禁語九工,有影真適合內觀深省,啥物是靜寂 ,多少有體會一寡,不過hō͘ 幾個少年囡仔鬱卒kah giōng-beh 擋bē-tiâu ,每盈暗半暝時,攏有人陷眠 喝kah 大細聲,而且閣句讀分明,第一、二暗叫是有人半暝leh 開講,尾仔chaih 知,tang 時仔in 是leh 陷眠。可見人ê 「嘴舌無骨,反出反入」,beh kā 禁止是jōa-ni̍h 艱苦ê 代誌,嘴孔oh 修 ,m̄ 但食--niâ,講話共款oh 禁。
轉去