台語華語辭典
台灣記憶
[轉去本站首頁]    [轉去台灣俗語鹹酸甜]

有生,就有死。

    佛教ê 十二支緣起法是按呢:無明→行→識 →名色 →六入處→觸 →受→愛→取→有→生→老病死憂悲惱苦。講起誠分明,「有生,就有死。」人ùi 離開阿母ê 子宮hit 一工,就注定行向死亡之路,講起來實在有影恐怖無奈,m̄ 管你ê 人生觀如何,樂觀抑悲觀,死亡是不可免,人生ê 終站就是死亡。Che就是大自然ê 真理,就是法,任何眾生攏是仝一樣。
    雖然逐家攏知影「有生,就有死」是真理,亦是真簡單會凍了解ê 真理,可是大部分ê 人攏是貪生驚死,死--字出頭盡量mài 講,煞hō͘ 一、二、三、四ê 四受著無公平ê 對待,死、四仝韻嘛仝命運,為著閃避死亡,人間m̄ 知有外濟禁忌 ,敢講知影閃避伊就bē 來到chit?
    人ê 愚痴 就是按呢生,hiah chē ê 迷信只是為著求一個心安而已。
    「人是有煩惱,chiah 會去求佛」,雖然有伊ê 功效,信仰ê 力量有影展現伊不可思議ê 力量,但是心安了後,你ê 身苦病痛敢有影真正消失?尤其是留tiàm 內心潛意識 ê 驚惶苦楚,忿怒凝心猶原tī 心內tī 苦海。「有生,就有死」,mài 貪生,mài 驚死,按怎了脫生死,充滿喜樂健康ê 人生,你必須自修、自悟,內觀法門就是教人體驗無常、苦、無我ê 真理,最後達到解脫之道,m̄ 但知影「有生,就有死」,閣因為修煉ê 功夫,無有好bái ê 分別,無帶貪愛、瞋恨 抑執著 ,最後無生亦無死。
轉去