台語華語辭典
台灣記憶
[轉去本站首頁]    [轉去台灣俗語鹹酸甜]

人是有事,chiah 求佛。(人是有煩惱,chiah 會去求佛)

    囡仔跋倒叫阿娘,che 大概是人ê 本能 、天性,人ùi 老母ê 子宮孕育 ,阿母ê 子宮就是咱ê 原命之所,咱有災難,m̄ 呼救賜命之母,beh 叫啥人kā 咱救命咧!
    等到大漢,因為人為 ê 教育,tio̍h--ê 也學,m̄-tio̍h--ê 嘛學,煞hō͘ 本成清氣ê 心污染變濁,齷齪 在心內,beh 講驚人知,只好tn̄g 著代誌大條chiah kap 神明、佛祖,抑是耶穌基督、阿拉、上帝交陪,拜託、祈禱、求保庇。
    「人是有事,chiah求佛」,實在無m̄ 著,好tī 好代 ,享受人生之時,啥人會記得救苦救難ê 媽祖婆、帝爺公,攏是工課bē 順,囝孫不孝,厝內欠安ê 時陣,chiah 會去想著神明ê 神通、大慈大悲ê 靈聖,這是人ê 本性,嘛是弱點。
    你無khòaⁿ 一個囡仔歡歡喜喜chhit-thô,敢會去想著老母ê 存在,一旦跋倒、腹肚枵,隨時阿母、阿娘叫bē 煞。其實大人嘛是仝一樣,各人求伊心內之神tàu 保庇,hō͘ 日子過了順序、歡喜,人ài 有信仰總是卡好過日。
    Chit 次參加「十日內觀禪修」,師父一再交代m̄-thang 心內有神,坐禪bē 使chit 用唸咒抑是用觀想 ,kan-nā 強調用平等心、專注去覺知,講嘛有影,tng 當用平等心kap 專注tī 呼吸時,一點鐘久一時仔就過去,輕鬆無艱苦;m̄-kú tng 你心情táⁿ-hiáⁿ 心bē 專時,害--lò͘,腰酸背痛,腳麻手痺 ê 苦楚,真真是叫苦連天,chit 時,姑不將偷偷仔請來佛祖救苦,隨時暗唸佛經,觀想世尊,有影無外久,痛苦已經消失無蹤,「人是有煩惱,chiah 會去求佛」,果然有伊ê 功效,信仰ê 力量有影不可思議。
    不過話講倒轉來,內觀ê 價值是教人家己自救,mài 靠神佛,神佛hō͘ 咱尊敬可以,beh 救苦就學佛陀ê 教法,平等ê 心,專注ê 心,最後達到解脫之道,這是理想,嘛是目標,只是m̄ 知tī 時才會得著。平等ê 心:爽快ê 時陣,mài 向望爽快會繼續落去;無爽快ê 時陣,嘛mài 向望無爽快會卡緊消失。謹記在心 ,謹記在心。
轉去