台語華語辭典
台灣記憶
[轉去本站首頁]    [轉去台灣俗語鹹酸甜]

一聲天,一聲地,一聲母,一聲父。

    Chit 遍乞食過溪去台中新社鄉,參加chit-ê 研習叫做「內觀十日禪 修」,敢有人bat 聽過?
    啥物是內觀(vipassana)?內觀是印度上蓋古早ê 一種禪修法門。失傳chiâⁿ 久了後,2500年前閣hō͘ 佛陀釋迦牟尼重新發現。內觀ê 意思就是如實觀察,洞察事物ê 真面目,透過觀察家己來淨化身心ê 一個過程。代先觀察自然ê 呼吸 來集中注意力,續落去觀察身心ê 實相性,去體驗無常、苦、無我。雖然是佛陀發現ê 法門,m̄-kú kap 任何有組織ê 宗教抑是宗派無關。所以任何人攏會使chit 參加修行,得著實際ê 利益。
    教法上重要ê 工課就是坐禪,一工愛坐十二點鐘久,每一點鐘抑是二點鐘中間才有五分鐘ê 歇睏niâ,兩支腳屈tiàm 蒲團 頂,隨在你ê 姿勢,你若感覺爽快舒適 就好,不過姿勢安定了就bē 使chit 閣徙腳tín 動。
    別人按怎坐,無閒工去斟酌,因為禪房暗暗無外光,氣氛靜肅,只有家己觀察呼吸ê 專注,哪有心思去注意其他ê 代誌,所以一下坐定,就kan-nā 照師父ê 教示去專心覺知 呼吸,m̄ 知過去外久,雙腳開始起酸,續落去就是痛kap 麻 ,麻kah hō͘ 你m̄ 知有腳骨ê 存在,痛kah hō͘ 你擋bē-tiâu ,真正是痛tiuh-tiuh,tiuh-tiuh 痛,差一點仔著哀出聲:
    「阿娘--喂!我無ài 啦!」
    「佛祖--à,你嘛tàu 保庇咧!Mài hō͘ 我閣疼,好無!」
    「耶穌基督--à!求你赦免我!賜我力量,hō͘ 我脫過難關。」
    師父ê 交代指示,講按呢攏m̄ 著,有苦家己救,家己chiah 是主人,佛祖、上帝、媽祖婆、帝爺公是無tī 咱chit-ê 所在,祈禱、唸咒 攏無效啦!
    時間一分一秒過,夭壽 ,一分一秒哪會chiah-ni̍h 長,真正有影疼kah 「一聲天,一聲地,一聲母,一聲父」--lioh!雖然哀苦叫絕,時間猶原無聲無說,鐘聲猶原bē 記得響起…
    「師父--à!Bē 使chit 念經,bē 使chit 唸咒,嘛bē 使chit 觀想 天神、耶穌、上帝…ah 到底是beh 叫人按怎消除苦咧?夭壽疼你敢知影?」
    歡喜嘛kā 觀察,痛苦嘛kā 觀察,只有觀察,只有覺知,專注ê 覺知,愛用「平等心」去覺知:爽快ê 時陣,mài 向望爽快會繼續落去;無爽快ê 時陣,嘛mài 向望無爽快會卡緊消失,按呢--niâ。
    Khan-liân-tē m̄-bat 坐過禪ê 我,參加chit-ê 「十工禪修」,第一擺坐落去就體會著無常、苦ê 苦味,有偌苦,坐看覓咧你著知,「一聲天,一聲地,一聲母,一聲父。」叫苦連天,哀父叫母按呢--niâ,tī 第五工ê 時陣,有一位教授同修按呢偷偷仔kā 我講:
    『真是自作孽,好好的假期不享受,偏偏來這裡受苦,活該。』
轉去