台語華語辭典
台灣記憶
[轉去本站首頁]    [轉去台灣俗語鹹酸甜]

功夫在手,beh 食便有(iú )。

    想起卡早細漢時,人生必須品無chín. chiah 豐富,食會飽、穿會燒就誠滿足過日,亦是因為欲望少,生活上卡無chit-kú ê 緊張無閒。
    斯當時,囡仔人除了去學仔讀冊,轉到厝裡m̄ 是chhōa 小弟小妹,著是chhit-thô 走相jiok ,老師交代ê 習題無濟,一目nih 仔就寫了了,當然這是指一般讀冊囡仔ê 生活,亦是大部分讀冊囡仔攏是按呢過--ê。
    敢有特別ê 情形?有,是五、六年--ê ê 升學班,因為in beh 升學讀初中,需要考試,所以無補習著卡無可能考tiâu 好學校,不過國民學校出業,會凍進入初中讀冊ê 人無濟,剩--ê 無thang 讀初中ê 少年囡仔,in 父母著愛kā 發落去學一項仔功夫,親像學kap-choh ,做西裝,學to-chí 、剃頭、烏手仔,嘛有學相命、看地理、起厝做土水,卡幼秀--ê 著是學修理錶仔、做藥局生…查某囡仔學做衫仔(女裝)、電頭毛--ê 卡濟,只要三年四kò月 出師了後,會凍趁錢生活,啥物行業都有人學,「功夫在手,beh 食便有(iú)」,若無繼續讀冊ê 人,著愛學一項仔功夫,一生ê 食穿、成家立業、娶某生囝,才有保障,無半撇ê 大人是beh 按怎過生活--neh?
    讀冊--ê 讀冊,學功夫--ê 學功夫,大漢了後逐家攏有生活ê 本領,社會自然安定,chit-mái 時代就無共款,逐家相爭beh 讀大學,自細漢就認真thui ,補習了閣再補,kan-nā 想beh chìⁿ 入去 大學ê 路,煞hō͘ 一寡chiⁿ bē 入去ê 青少年,也無學啥物功夫,一時beh chhōe 頭路,煞真oh chhōe ,技術性--ê 伊bē 曉,無技術性--ê 閣嫌硬斗 ,十做九不成,變成社會問題一大堆,雖然政府有leh 輔導就業,有技藝中心教人學功夫,總是無夠普遍,奉勸無繼續讀冊ê 少年兄,著趕緊學一項仔技能,「功夫在手,beh 食便有」,實在無kā 你騙。
轉去