台語華語辭典
台灣記憶
[轉去本站首頁]    [轉去台灣俗語鹹酸甜]

人情世事陪kah 夠,無鼎kāng 無灶。

    十月十,人收冬,頭家chhiàⁿ 長工;
    十一月,年兜邊,家家戶戶人搓圓;
    十二月,換新衫,來過年。
    十月冬稻仔 割了,田園ê 工課有小可卡閒,除了種chē. 糊仔蕃薯 以外,嘛有人種卡省工ê 雜糧,所以作穡人卡有閒發落一寡仔重要大事,比論講入厝、娶新婦、嫁查某囝,攏會選chit-ê 時陣來鬧熱,猶有謝平安冬尾戲ê 拜拜,嘛tī 尾牙晉前chit 段時間,各庄頭輪流拜神請人客。
    頂個月月初,呂校長嫁查某囝,兩工後是陳老師beh 娶某,禮拜日阮阿舅嘛leh 娶新婦,短短一禮拜,紅包就包三kâi , chit-mái 上少ê 價數是一千,交陪好--ê 抑是親成,無兩千以上bē 准過?月半以後猶閣有,林老師beh 入厝,有hông 賀 ,紅包禮bē 凍無,伊是請中晝,暗時仔阮好朋友阿旗辦--ê 又是新娘攤,連食兩頓,頓頓魚肉臭臊,猶閣有,卡講嘛是喜宴,總是紅包禮一包一包一直包,一個月內chiaⁿ 十包 ,薪水去beh 一半,食是食kah 會起驚,食kah 會起畏 ,人講「人情世事陪kah 夠,無鼎kāng 無灶」,chit 擺有影經驗著--à,時常leh hông 請,當然灶腳閒仙仙;紅包包一下濟,落袋仔煞leh 袋磅子leh lōng-liú-lian ,人情世事ê 陪綴實在有夠pháiⁿ-pháng,好佳哉chit-mái 囡仔已經大漢,家己會曉趁錢,若無有影米甕仔會弄lâu ,無米thang 煮食 ,拄著弔鼎ê 無奈都會來發生,chit-mái ê 囡仔敢想會到?
    陪綴著chām-chat ,禮尚往來,有來仔有去,濟來濟去,少來少去,會省儘量省,朋友交陪重感情,平常ê 交情卡要緊,哪著辦kah hiah chhia-iāⁿ 是beh-nî!「人情世事陪kah 夠,無鼎kāng 無灶」,值得逐家思考看覓咧!
轉去