台語華語辭典
台灣記憶
[轉去本站首頁]    [轉去台灣俗語鹹酸甜]

三寸氣在.千般用,一旦無常.萬事休。

    老朋友圳--à .頂禮拜死老父,傷心怨嘆kah beh 死,傷心in 老母早死,chit-mái 老父閣雄雄 來離開,使人感慨萬千,怨嘆無卡早有孝咧,taⁿ 實在傷慢--lò͘!想講在來老 爸伊人身體都勇勇健健,日常生活逐項代誌抑m̄ 免hō͘ 人費氣,啥知kan-nā 小可去hō͘ 感--著 就來惹起he-ku 喘 ,閣卡想bē 到--ê 是一下大心氣喘bē khit 來,一kô 痰 塞咧,ah 就一命歸陰!唉!
    圳--à 是穿開腳褲仔大漢ê 囡仔伴,人伊卡gâu,大學出業了後,就hō͘ 伊nǹg à nǹg,鑽kah tī 中央teh 食頭路,人tī 台北,無thang 日日纏 tòe tī 老父ê 身軀邊,總是見若tn̄g 著假日歇睏,攏會轉來田中陪伴伊peh 山chhit-thô,chhōe 親成朋友phò-tāu 開講。頂個月才chhōa 伊去信義風櫃斗看梅仔花,人伊老大人一下歡喜,閣要求講後cho̍ah 咱來去阿里山看日出……
    想bē 到chiah 一禮拜--niâ,唉!「三寸氣在.千般用,一旦無常.萬事休」…哪會有影chiah-ni̍h 世事無常--neh?
    圳--à ê 孝心通人知,看伊思念老父ê 深情,嘛hō͘ 我目箍做一下紅khit 來,伊恬恬徛tiàm 老父ê 靈前,輕輕仔唸出「三寸khùi. chāi. chhian poan ēng,it-tàn bû-siông 萬事休」,世事本成就是無常,萬法終歸於滅,人.有生就有死,何況蔭仔叔陽壽食kah 八十五,序細閣chiah 孝順體貼,會用得講是福壽全歸,伊嘛ài 含笑歸土 ,敢m̄ 是咧!
    講是按呢講,總是m̄ 甘!
    M̄ 甘!嘛著送伊行,總是發落喪事要緊,mài 花費傷濟,備辦喪禮著照起工,合禮俗--ê 嘛著合時勢,舊例無滅,新例mài 設,在生有孝卡要緊,外人ê 話聽bē 了,莊嚴肅穆 為第一,其他--ê 啥物陣頭、鬧熱出頭,會減就儘量減,m̄ 是好風俗。
    Lah-jih--ê,你按呢講閣有道理,送阮阿爸最後一程,就照你講按呢來發落,「三寸氣在.千般用,一旦無常.萬事休」,m̄-thang kā 想kah 傷悲觀,特別是已經chiūⁿ 壽 ,福壽雙全ê 序大人,送終應該用歡喜心,莊嚴肅穆為第一。
轉去