台語華語辭典
台灣記憶
[轉去本站首頁]    [轉去台灣俗語鹹酸甜]

釣魚、掠鳥,某仔囝餓死了了。

    中國故事封神榜內底,姜子牙ê 釣魚術會值得人欣賞o-ló ê 所在,就是伊無用倒鉤gí-á ê 魚鉤,嘛無用魚餌 siâⁿ 魚仔chiūⁿ 釣,而且閣離水三寸,chit 款釣魚是beh 按怎釣有neh?
    因為姜太公釣魚ê 哲學是:願者上鉤。He 是釣心酸,he 是釣修養,釣趣味。
    古早中國ê gâu 人 教人網鳥,就網開一面,hō͘ 伊自然會凍閣生湠,m̄-thang 趕盡殺絕,hō͘ 伊孤khu̍t 。
    Chit-mái ê 人釣魚有ê 已經變質,為著趁錢,顧魚池ê 頭家,去買會thâi 得 ê 活魚,放hō͘ 濟濟tī 魚池內底,siâⁿ 來釣魚人客,hō͘ in 落鉤就咬,釣hō͘ 濟濟chiah 閣算斤兩,俗俗賣倒轉去hō͘ 頭家,頭家趁租金kap 利純 ,人客會凍消磨時間,兼虐待 魚栽得著爽oaiⁿ-oaiⁿ。
    若按呢猶無夠喟 ,閣會凍用大門魚鉤 ,一竿縛五、六門,嘛m̄ 免khǹg 魚餌,隨便ùi 魚池底,亂使掃亂使掣 ,魚鉤利劍劍,魚仔走bē 赴,見若魚鉤kha̍p 著 身軀,血水仔 chho̍p-chho̍p tin chho̍p-chho̍p 流,夭壽--ò͘,chit 款m̄ 成囝,哪會chiah-ni̍h 無天良?
    釣魚,釣魚,一日到暗kan-nā siáu 釣魚,厝裡有錢無錢攏m̄ 知,囡仔讀冊m̄-bat beh 關心,人講「釣魚、掠鳥,某仔囝餓死了了」,就是你chit 款無責任ê 查甫人。
    人若對待動物bē 慈悲,對待人對待家庭共款卡無情義,親像搭網tī 半山嶺頂,beh 網粉鳥ê 朋友,共款正經工課m̄ 願做,串做hit-lō 違法勒索 ,網人ê 粉鳥,叫人提錢來討,kài sêng 綁票,「釣魚、掠鳥,某仔囝餓死了了」,無m̄ 著,做若無好代,一定無好報。
    人著扑拼嘛著歇睏,歇睏需要消遣,聽音樂唱歌,寫字畫圖,peh 山旅行看風景,看戲看展覽,se̍h 街 買物,就是講釣魚仔放粉鳥嘛是會使chit,只要是正經無敗害,有衛生閣bē 牽礙著生態環境,若有錢thang khai ,啥物攏嘛會用得。
    「釣魚、掠鳥,某仔囝餓死了了」,迄款ê 釣魚,迄款ê 掠鳥,上好攏mài。
轉去