台語華語辭典
台灣記憶
[轉去本站首頁]    [轉去台灣俗語鹹酸甜]

一漢仔 若無雕 ,大漢就ut bē khiau 。

    子不學,父之過,教不嚴,師之惰。嚴師出高徒,自古就是按呢論說,致使到扑罵ê 教育方法,到此當今猶原禁bē 斷根,雖然政府一再要求老師,教育需要用愛,愛ê 教育是新時代ê 趨勢,m̄-kú 你kā 看報紙,看TV 新聞,體罰學生ê 個案無斷,敢講老師攏無愛心?其實扑學生囡仔扑kah 出問題ê 老師,大多數攏是有責任ê 好老師,為啥物in 會lún bē-tiâu 來扑學生?「愛之深,責之切」 是上好ê 解說。
    教囡仔假那tiau 盆景,「一漢仔若無雕,大漢就ut bē 曲」,實在有影,看栽培盆景ê 師傅,一欉 無雕過ê 榕仔 栽,枝骨是giàng-sâ-sâ ,就親像欠教示ê 囡仔栽無禮無貌無大無細。樹椏經過師傅ê 調理,該剪就剪,該雕就雕,雕會khiau 會súi 型,就sè-jī 雕hō͘ súi 款,總是sè-jī 為要,千萬m̄-thang 雕過頭,遏斷oe 就無彩工,過頭無過頭,有經驗ê 師傅上知;教囡仔著知囡仔性,囡仔生成活潑ngiāu-ngiāu 動,教育就是beh kā 成做一個有路用ê 人,如果細漢無kā chhiâⁿ 教 ,大漢自然m̄-bat 道理枵飽吵 ,「一漢仔若無雕,大漢就ut bē 曲」,這是逐家攏知影ê 道理。
    Beh 按怎雕,這就是教育方法ê 分寸,雕傷過磅是體罰,雕無夠講是théng-sēng ,有責任ê 老師,愛心負責猶無夠,講究方法chiah 有gâu,耐心加關心,有心閣著用心,m̄ 但做有愛心ê 園丁,上好是做一個雕盆景ê 師傅,才是現代ê 老師。
    
    
    
轉去