台語華語辭典
台灣記憶
[轉去本站首頁]    [轉去台灣俗語鹹酸甜]

三十歲查甫是真tâng,三十歲查某是老人。

    論男女ê 體力,有影查甫人卡有牽挽 ,beh 扛beh mo͘h ,beh 擔beh phāiⁿ ,peh kôan 落井底,弓枋模 扛鐵箍,無查甫人無法度,m̄-kú 講「三十歲查甫是真tâng,三十歲查某是老人」就有卡過分,chín ê 時代按呢論說,有卡hàm --lah。
    啥物是真tâng,問吉凶趕煞氣,迷信ê 台灣人定定著觀神明 ,神明ê 代言人叫做童乩,嘛有人叫乩差,就是神明差伊來kap 人講話,觀有起童,童乩著phut-phut tiô,用銅針用寶劍,伊攏bē 著驚,若是假tâng,he.寶劍giâ 來剖是會出代誌--è,所以真神降乩,乩差一定活lèng-lèng,kài sêng 三十歲ê 查甫人,一尾那活龍,『活蹦亂跳』無一時仔閒。
    「三十歲查某是老人」,古早人是有可能,尤其是咱台灣人ê 祖先,蠻荒開墾ê 時代,儉食kut-la̍t 做,為著生湠chhiâⁿ 囝,也beh 內也beh 外,操勞過度自然消瘦落肉,台灣人ê 祖媽三十歲已經sêng 老人,是運命是無奈,敢有資格怨嘆?
    有祖公祖媽ê 扑拼經營,才有今仔日ê 享受繁榮,「 三十歲查某是老人 」已經是無流行,人生過程,做查某--ê 卡食虧是不得已,kan-nā chit 句「生一個囝落九枝花」,就知影查某人ê 身體衰lám 是為著「家」,查甫人著體貼,用心照顧恁hit 蕊花,m̄-thang 嫌人老bái,tín 動著.m̄ 是『黃臉婆』就是老柴耙,講著家己ê 牽手,見講無一句好話。
    Mài 管伊「三十歲查甫是真tâng,三十歲查某是老人」,總是翁某相敬如賓,ùi 結婚開始到白頭偕老,chiah 是人生ê 真滋味。
轉去