台語華語辭典
台灣記憶
[轉去本站首頁]    [轉去台灣俗語鹹酸甜]

Lám -lám 查甫,卡贏勇勇查某。

    禮堂邊hit 塊空地,是一年仔生早起時集合訓練規矩ê 場所,升旗、講話、做體操、跳舞、表演逐日攏tī 遮活動。因為東爿 beh 起一棟教室,起厝材料滿滿是,工程車出出入入,無方便閣危險,姑不將活動ê 位置著徙卡西爿一下。
    Hit 日,一年級ê 老師準備beh 搬徙hit 台司令臺,大約著徙二十公尺,十一個老師手ńg pih 起來 ,腳馬soah hō͘ 在 ,一聲開始「Haih-sioh!Haih-sioh 」就beh 扛徙位,大粒汗細粒汗kòng-kòng 流,舞五、六分鐘chiah 徙兩公尺遠,無伊法度。
    總務蕭主任拄好巡視來到chit :各位老師!Taⁿ 暫時好停睏,看恁芳汗一直bun ,hō͘ 人m̄ 甘不忍心,我來去頭前運動埕hit 旁,叫幾個仔少年後生仔來鬥腳手,小等--兩分鐘,連鞭就來。
    原來一年仔ê 級任老師攏是查某--ê,莫怪粗重工課做bē 來。
    一tah 久仔,chông 來 四個查甫老師,斯文斯文,體格生做鐵骨仔生 鐵骨仔生,隨時身軀àⁿ 落去,八支腳屈好勢,『一、二!一、二!』一目nih 仔徙到預定ê 所在,閣頓 kah 好勢好勢,thang-hō͘ 一年生舉行『朝會』。
    感謝--ō͘,恁chia-ê 查甫老師!有影恁遮ê 「lám-lám 查甫,卡贏」阮遮ê 「勇勇查某」to-tio̍h,勞力啦!
    「Lám-lám 查甫,卡贏勇勇查某」,是leh 論體力,上帝創造人類本成著分男女,意思是beh hō͘ 人認清身分,互相合作,互相疼痛相kēng ,創造美滿ê 人生,聰明才智平pāng 無分,體格力頭卻是ùi 青春年代以後就開始分明,幼秀工課若有用心學,啥人都會曉,若是粗重工課,猶是查甫人卡khiàng。「Lám-lám 查甫,卡贏勇勇查某」,嘛是有影。
    「Lám-lám 查甫,卡贏勇勇查某」,你若kā 誤會是查甫人事事項項攏佔贏,he .就偏見了,大男兒主義ê 查甫人著注意,論體力有影「lám-lám 查甫,卡贏勇勇查某」,若是論智慧辦事能力,khiàng 腳查某,可能會hō͘ 你真大ê 壓力,時代無仝--lò͘,無論男女,無論好歹時機,愛拚才會贏。
轉去