人. 生2 蕊目chiu beh hông 看khah chē,生2 kâi 耳á ài 人斟酌聽,單生1 支嘴,就是警告人m̄-thang chhìn-chhái 講話,o͘-pe̍h chòaⁿ o͘-pe̍h thi̍h,因為病ùi 口入,禍從嘴出--a。 | 佛祖教人tio̍h 修口業,欺騙話bē-sái 講,lōng 狗相咬ê 言語不可說,花言巧語心無正,惡言惡語sian m̄-thang。講--是án-ni講,beh 做到,若m̄ 是chám-jiân-á 有修養ê 人,tiāⁿ-tiāⁿ 就會犯錯,因為「話,3尖6角,角角會傷--人」,講pháiⁿ 聽話,講氣話,lóng 是無經過思考,無經過Si-a-geh,嘴快嘴快,講會出嘴,講會歡喜就好,這款話自然3尖6角,自然會傷人。 | 頂日á 1 位政府官員,為著美國政治獻金案,hông 列入訪問名單,1 時憤怒罵人是豬;罵美國人無人會計較,罵新聞記者soah 引起人àu-siâu,豬是代表siáⁿ-mih 德行,ta̍k-ê 心知肚明,當然人m̄ 放i 干休,記者界愛i 會失禮,若無,beh kā i 告到底。 | Che. 就是「話,3尖6角,角角會傷--人」上好ê 證明;目chiu 加看--kóa,耳空聽khah 清楚--leh,話屎減講--kóa,生活自然清淨。
|
| 【註解】 目chiu:目睭,『眼睛』。 beh:卜,『要』。 hō͘:予,『給』,『被』。 hông:hō͘-lâng,hō͘ 人。 khah:卡,較。 chē:濟,『多』。 2 kâi:2 個。 耳á:『耳朵』。 斟酌:chim-chiok,注意。。 嘴:chhùi,喙,『嘴巴』。 m̄-thang:毋通,『不要』。 chhìn-chhái:瀙彩,隨便。 o͘-pe̍h:胡白,烏白。 o͘-pe̍h chòaⁿ o͘-pe̍h thi̍h:胡白 chòaⁿ 胡白thi̍h,胡言亂說。 a:啊,矣,話尾詞。 tio̍h:著,得,『必須』。 bē-sái:bē使,『不可以』。 lōng 狗相咬:『興風作浪』。 ê:兮,的。 sian m̄-thang:『千萬不可以』。 án-ni:按呢,『這樣』、『如此』。 m̄:毋,『不』。 chám-jiân-á:斬然,嶄然á,真明顯,『非常的』。 tiāⁿ-tiāⁿ:定定,常常。 pháiⁿ:歹,hāi--去,困難,『壞』。 lóng:攏,『全部』。 Si-a-geh:,日本話『修飾』。 這款:chit 款,『這樣子的』。 á:仔,表示細--ê、kó͘-chui--ê、輕視--ê ê 意思。 soah:煞,想bē 到,『竟然』。 àu-siâu:àu 面討厭。 siáⁿ-mih:啥麼,啥乜,啥物,什麼。 ta̍k-ê:逐家,『大家』。 i:伊,『他』,『她』,『它』。 干休:kan-hiu。 會失禮:道歉。 kā:共,『把』,『給』。 kā i:『跟他…』。 kóa:寡,『一些』。 加看--kóa:『多看一些』。 耳空:耳孔,『耳朵』。 leh:咧。 話屎:『閒話』。
|
| |