台語華語辭典
台灣記憶
[轉去本站首頁]    [轉去台灣俗語鹹酸甜]

食甜食鹹,臭腳鼻liâm 。

    恭喜!恭喜!食一粒糖仔啦!
    「食甜甜,hō͘ 恁新婦生後生!」
    糖仔,瓜子,一大堆,連鞭柑仔糖,連鞭『巧克力』(chocolate ),軟糖bē-bái 食,土豆糖仔芳閣酥,旺梨糖好氣味,冬瓜糖上清甜。
    「taⁿ ,也m̄ 是家己,也m̄ 是別人,哪著chiah-ni̍h 客氣?」
    猶閣有--ò͘ !來!che. 是鹹酸甜,有仙楂、李仔鹹,旺梨糕,楊桃乾,酸chhè 梅kap chhó 橄仔,beh 食家己thok ,mài 客氣,客氣就m̄ 是家己。
    「ah !che. 梅仔傷酸,李仔傷鹹,旺梨傷甜…」
    「嘴食嘴嫌,甜鹹.chiáⁿ. 無嫌,人講仙楂、李仔鹹,臭酸食到生黏,著是你chit 款人!」
    來!小弟弟!食-- 一粒!…唉!你哪會m̄ 食?
    「人阮阿公講:食甜食鹹,會臭腳鼻liâm--neh !人阮無愛食!」
    哪會chiah 乖巧ê 囡仔,無要緊啦!阿公講:「食甜食鹹,臭腳鼻liâm 。」he. 是leh 教人m̄-thang 胡白食,若胡白食物件,會歹腹肚,腹肚痛,遮ê 鹹酸甜攏真有衛生,食看覓無要緊,mài 食傷濟著好。
    「食甜食鹹,臭腳鼻liâm 。」無hit-lō 代誌,病ùi 嘴入,衛生第一,適可而止,mài 食傷濟,注重衛生,百病不生,身體勇壯,自然健康。
    φ註解φ
    腳鼻liâm:[小腿前面部份]。
    臭腳鼻liâm:腳鼻liâm 生瘡潰爛。
    新婦:sim-pū,媳婦。
    後生:查甫囝。
    連鞭:liâm-mī,一tah-kú-á,[一下子]。
    柑仔糖:kâm-á-thn̂g,[含在嘴裡舔的糖果]。
    bē-bái:不錯,真好。
    chhè 梅:脆梅。
    chhó 橄仔:加甘草製造ê 橄欖乾。
    thok:齒托thok 物件。
    嘴食嘴嫌:[邊吃邊說不好吃]。
    甜鹹.chiáⁿ.無嫌:[甜的、鹹的、淡的都好吃]。
    臭酸食到生黏:啥麼攏好食。
    適可而止:sek khó jî chí。
    百病不生:pah pēⁿ put seng。
轉去