台語華語辭典
台灣記憶
[轉去本站首頁]    [轉去台灣俗語鹹酸甜]

飼後生,養老衰 ;飼查某囝,別人ê。

    Chiah-leh 講老人問題,是此當今上重大ê 社會問題,向望政府官員kap 立法委員做夥來排解,chit 時m̄ 重視,等咱食老定著liân-hôe。
    做人敢有影chiah-ni̍h 無奈,一生正經,認真扑拼,經營家庭,結尾tn̄g 著食老bē 哺土豆ê 時,煞hō͘ 人giat-láu 趕出門腳口,tòa 老人院leh khek-khui ,古早人he. 含飴弄孫 ê 趣味,煞變成孤khu̍t 鬱卒。怨嘆,悲哀;悲哀,怨嘆。啥造成?
    「飼後生,養老衰;飼查某囝,別人ê。」明明就是重男輕女ê 本性,m̄ 著!M̄ 是本性,是查甫人ê à-pà 主義leh 作怪,查甫是囝,查某敢就m̄ 是?Che .實在有影奇怪,是m̄ 是父權社會ê 誤解,嫁出就是別人ê,娶入敢有影著卡會bat 老父 ?會啦,當你會hōaⁿ 家 ,猶會做傢伙 ê 時,he.是老父niû-lé ,等到你若老衰老倒退hit 當陣,「飼後生,養老衰」,你著m̄-thang ǹg beh 恁囝共新婦,會kā 你捧燒捧冷,侍候三頓兼洗蕩。
    「飼查某囝,別人ê 」?時到你就發覺m̄ 是按呢論,當等後生新婦無beh kā 你洗蕩,hō͘ 你心酸無ǹg ,恁查某囝轉來--à,收收洗洗、清清掃掃,續落去kā 汝問,叨位酸、按怎鬱悶,身軀kā 你拭拭咧,藥仔侍候你食入腹,勸你放心,發落你倒落床,才來去轉。敢chiah 按呢--niâ,有ê 連囝婿都合倚來 ,照顧厝內ê 工課比後生猶閣卡熟似,半子是半子,kap 查某囝共款有責任,chín ê 社會,「飼後生,養老衰;飼查某囝,別人ê。」已經bē 準。
    查甫著chhiâⁿ,查某共款著疼,平平是囝,m̄-thang 受無符合時勢ê 傳統禮教影響,到時chiah 來反悔,對家己虧待,對查某囝嘛無公平,「飼後生、養老衰;飼查某囝,別人ê。」chit 款觀念著改,beh 改量早 。
轉去