台語華語辭典
台灣記憶
[轉去本站首頁]    [轉去台灣俗語鹹酸甜]

新例無設,舊例無滅。(新例莫設,舊例莫除。)

    (新例莫設,舊例莫除。)
    朋友beh 嫁查某囝,設筵席 tī 喜連來餐廳,在來 朋友著足愛 唱歌,chit 回伊特別安排KTV,beh kap 逐家相kap 趣味一下。
    為著beh hō͘ 節目順利進行,就kap 愛唱歌ê 朋友預約,本來無想beh 允伊 ê 邀請,朋友ê 好意實在真歹推辭,好佳哉是tī 餐廳內,若是tī 室外實在著m̄ 敢hiān-sì 。
    M̄ 知影ùi tī 時開始,食喜酒閣有thang 唱歌做gī-niū ,好共bái ,oh tit kap 人議論 ,聽來聽去,大部分ê 人攏無感覺按怎樣?Tī 家己心內自早以來就感覺怪怪,結婚是大事,雖然m̄ 免完全照古例,歡歡喜喜、正正經經辦代誌,總是必要,食喜酒、鬧洞房、祝福好眠夢、會親友請甜茶,若mài 過分奢華 攏是好風俗,beh 唱歌?閣是唱流行歌,敢bē 傷輕浮無適合。大部分ê 流行歌攏是你愛我我愛你,m̄-kú 攏是愛bē 著迄款ê 酸lam 甜 氣味,悲情目屎滴、怨慼兼後悔,beh kā 新人祝福,到底beh 唱啥物貨,oh 得chhōe ,最後就不管啥物歌,只要會,唱hō͘ 鬧熱嘛無人會加講話 。
    俗語講「新例無設,舊例無滅」,抑是「新例莫設,舊例莫除」攏總好,應該愛有革新ê 作用chiah 著,舊例無合時勢當然著愛改,改革ê 意義是beh hō͘ 社會閣卡進步,閣卡有文化,m̄ 知是政府ê 領導無夠積極,抑是台灣人ê 粗氣愛chhio-tiô ,大概是錢傷濟,文化水準無夠格,kìⁿ-tio̍h 鬧熱ê 場面,m̄ 是phah-phún ,就是鬧熱滾滾,只要會凍展示伊有錢有人面,啥物出頭都有人pìⁿ ,生理人設計,消費者出錢,按呢開始,台灣人開始墜落,「新例無設,舊例無滅」,古早味消失,無水準ê 出頭滿滿是,紅帖仔--ê 聽唱悲情ê 戀愛歌,嘛有兼看脫衣舞;白帖仔閣卡m̄ 是款,孝男孝女m̄ 願哭,倩一陣人來mà-mà 吼,hō͘ 你想bē 到,嘛有電子花車唱流行歌,閣有『清涼秀』 tàu 陣頭。其他--ê 就mài 閣講,進香團、選舉孔 ,閣講算bē 了,愈講愈hàm 古 ,就按呢 。
    「新例莫設,舊例莫除」,傷古板,「新例無設,舊例無滅」,著注意,無好新例照舊例,若beh 改新著愛有文化有氣質。
轉去