[轉去本站首頁]    [轉去台灣俗語鹹酸甜]

三腳tiô ,四腳跳。

    我上蓋趣味ê 運動:(國小學生台語演講稿)
    講著運動,阮囝仔人上歡喜,講著上體育課,阮就「三腳tiô,四腳跳」,『高興得不得了』。
    運動ê 項目真正濟,扑球、跳遠、kap 跳高,跳舞、體操、走相jek ,sio-ián 、peh 竹篙 、kap giú 大索 ,逐項攏嘛好,逐項攏嘛真好chhit-thô,萬百項運動項目,我上趣味--ê 就是「走相jek」。為啥物?請恁諸位評判先生kap 阿伯、阿姆、老師、同學,聽學生說分明:
    走相jek,真趣味,會使chit 緊,嘛會使chit 慢,歡喜ê 時陣pòng-pòng 走,腳酸ê 時陣liāu-liāu 仔是 ,體力若讚就那走飆 ,走了若倦就來『慢跑』,隨在咱,心適興,緊共慢,攏可以,你講chit 款ê 運動是m̄ 是真趣味,你若有趣味「走相jek」,一定會hō͘ 你歡喜!
    透早khit 來,天tú 扑氆光,運動衫褲、運動鞋,一切款好勢,出門開始se̍h ,行過街路,斡入去田園,風.微微仔吹,稻仔芳lām 著草仔氣味,hō͘ 人心涼脾肚開;hāⁿ 過一條清水溪,聽著水流聲,hō͘ 我想起阮阿娘,chit-mái tú-leh 煮飯等我轉去食;續落去天色已經光iāⁿ-iāⁿ ,有看著人影,我就開始大步走,跳過田岸,潦過低水ê 菜園kap 芎蕉腳,已經beh 七點,趕緊phiu-liu-siu 『趕回家』,阿母飯煮熟等我食,食飽beh 載我去『學校』,che 就是讀冊日子ê 早起。
    若是講著歇睏日,我就招阮阿爸kap 阿 i ,相及做夥去peh 阮Chhân-tiong-ng ê 鼓山寺,鼓山寺離田中街路有兩公里,阮慣習用行路,無愛坐車,出門晉前先約定,啥人代先到山腳,tio̍h-ài 小停,聽候會齊chiah 閣起程,阿母卡頇慢,半行半走做頭前,我hām 阿爸是半走半lōng ,拚看啥人無夠力tio̍h-ài 半路停,結果亦是我上gâu,一路無停睏,得著第一等,阿爸講我ê 本頂是生成。
    半生成,是有影,自細漢就真愛kap 人走相jek, tiāⁿ-tiāⁿ 嘛著一等,人人o-ló 我是一ê 飛毛腿,閣比論是非洲ê 羚羊 ,走飆khit 來那leh 飛,啥人都tio̍h-ài tòe 後尾,無人thang 比 phēng,『羚羊快腿』就按呢叫tiâu 底。
    講正經,beh 做『羚羊快腿』m̄ 是hiah 簡單,m̄ 是kan-nā 趣味就會使chit,趣味是hō͘ 人走khit 來卡歡喜,beh 進步,猶是平常ê 練習上要緊,身軀身愛正,目睭看頭前,雙手自然擺動,腳步輕鬆閣chiâu 勻 ;面容m̄-thang 傷嚴肅,嘛bē 使kek 悾悾戇戇,總講一句,心ài 專注,走hō͘ 輕鬆,若是分心,就會影響效果,上好會凍節時間,逐擺做比較,家己比家己,突破記錄,一日贏過一日。
    走相jek 抑是走飆,會hō͘ 人有活力,精神好,體力活lèng-lèng ,增加抵抗力,百病bē 發生,逐家做夥來運動,做夥來走飆,走出健康,走出希望,走出有向望美麗ê 人生。講著運動,講著上體育課,講著走相jek 抑是走飆,阮隨時就「三腳tiô,四腳跳」,『高興得不得了』。演講到遮煞,祝逐家身體健康,平安,吉祥!
[轉去本站首頁]    [轉去台灣俗語鹹酸甜]