[轉去本站首頁]    [轉去台灣俗語鹹酸甜]

四支釘釘落去 。

    講起蔭仔叔,圳--à in 老父,實在好命,養育五男二女,個個都有孝,個個都真gâu、真出脫 ,大漢後生圳--à tī 中央政府teh 食頭路,第二--ê tī 省政府做科長,三囝做生理趁kah 啦啦叫,第四後生kap 屘仔kiáⁿ 攏tī 學校leh 教冊;兩--ê 查某囝嫁了嘛攏bē-bái,囝婿kài sêng 家己親生--ê,有孝閣體貼,福壽兩全,真有福報就是蔭仔叔。
    「四支釘釘落去」hit 一工,花箍聯軸 滿滿是,來拈香公祭ê 人士,大部分是穿西裝--ê,迄款ê 人面,迄款ê 排場,啥人bē o-ló,啥人bē 欣羨,好佳哉圳--à in 兄弟有斬節,遐ê a-sa-phuh-luh ê 出頭陣頭事先就辭了了,若無,就有影hō͘ 庄腳人看了真chhia-iāⁿ,bat 禮ê 人看了歹名聲--lò͘,莊嚴肅穆無超過正道,會得o-ló。
    表面上是按呢風聲,蔭仔叔死了福壽兩全、真有福報,in 囝孫kā 伊ê 喪事辦kah 拄好拄好,m̄-kú 旁邊 ê 厝邊隔壁評語是按呢講:蔭叔--à 有影好命,後生、新婦、查某囝、囝婿攏真有孝,過身了後,喪事kā 辦kah chiah 鬧熱,伊應該死了真著時,死了笑笑嘛是應該。若是蔭嬸--à 就無伊ê 福氣,拖磨一世人,斯當時,翁婿蔭叔--à tng leh bòng 時,囡仔一個一個攏才三、四歲,五、六歲,上大--ê 阿圳嘛才十thóng 歲,六、七個囡仔ê 重擔攏靠伊一身,好佳哉蔭叔--à bòng 了有回頭,chiah 有法度chhiâⁿ chiah-ê 囝親像--人 ,蔭嬸--à 實在無福氣,人伊蔭叔--à ê 福運卡大天,m̄-chiah 有今仔日ê chhia-iāⁿ hiâ-pai。
    福報!福報!福報是啥物?今日生今日報,現食有食福,beh 穿súi tin-tang,beh tòa 有西洋樓,出門Benz、BMW,富貴財子壽,逐項會逐項有,但是平凡ê 人--à,有一工,「四支釘釘落去」了後,『蓋棺論定』了後,chhun--ê 是啥物?Mài 講了脫人生,kan-nā 講人死留名,hit 時你留落來hō͘ 人懷念--ê 是啥物?
[轉去本站首頁]    [轉去台灣俗語鹹酸甜]