[轉去本站首頁]    [轉去台灣俗語鹹酸甜]

娶--ê 娶一個,嫁--ê 嫁人一家。

    鄧先生 最近誠操煩,操煩in 囝beh 娶某,媒人一個報過一個,m̄ 是嫌人父母頇慢,就是煩惱未來ê 新婦in ê 兄弟姊妹傷大陣,以後oh 陪綴 ,嘛歹kap 人比 phēng ,閣考慮後生傷古意,驚做娶著khiàng 新婦,會hō͘ 新婦管,做某奴,實在有夠厚操煩to-tio̍h。
    老鄧--ê,taⁿ 你嘛m̄-thang hiah 煩惱,逐工chho̍p-chho̍p 唸 ,某.也m̄ 是你beh 娶,人in 少年人若會合,看了有四配, 你kā 操煩hiah chē beh-nî !阮beh 嫁查某囝都無leh 掛心,o 娶新婦也著操心peh 腹,笑死人!
    你無聽人leh 講:「娶--ê 娶一個,嫁--ê 嫁人一家」,娶新婦m̄ 卡簡單,sián 頭仔拴hō͘ 便 就無代誌--à,新婦娶入門若會受咱ê 家教,管汰in 親家親姆好款待無,陪綴ê 代誌可大可小,好親chiâⁿ 交卡親咧,歹親chiâⁿ 有禮就好,免顧慮hiah 濟啦!Ah 若像阮beh 嫁查某囝,就有影著斟酌,門戶相當才bē hō͘ 人看輕,ta-ke 官 好性地明理好款待,查某囝嫁過去chiah 會幸福快樂,嫁出去ê 查某囡仔,是beh 暝日kap 人鬥陣做堆,仝一口灶ê 人,若bē 和諧,食虧--ê 一定是新加入ê 新婦人,敢m̄ 是?
    「娶--ê 娶一個,嫁--ê 嫁人一家」,既然有緣來做夥,一個也好,一家嘛共款,互相攏著忍耐,互相攏著照顧,幸福是逐家ê,m̄ 是我好恁煩惱,嘛m̄ 是恁bái 我hiau-pai,若有chit 款ê 自覺,嫁娶攏m̄-thang 傷計較,兩家結合ê 姻緣,是ài 互相尊重,互相經過包裝,恩恩愛愛,相敬像親人。
[轉去本站首頁]    [轉去台灣俗語鹹酸甜]